Online-Servicer kënne forcéiert ginn, Commentairen an Informatioune komplett ze läschen, déi géint Gesetzer verstoussen.

Dat huet den Europäesche Geriichtshaff decidéiert. Dorënner fält zum Beispill och ee Facebook-Post, dee vun anere User weider verbreet gouf.

Zil ass, Äusserungen, déi als net legitimme agestuuft goufen, méiglechst komplett aus dem Netz ze eliminéieren.

De Fall war viru Jore vun der fréierer éisträichescher Grénger-Politikerin Eva Glawischnig-Piesczek un d'Rulle bruecht ginn. Si hat gefuerdert, dass ähnlech Beleidegunge misste geläscht ginn. Den Ieweschte Geriichtshaff an Éisträich hat den Europäesche Geriichtshaff domat chargéiert ze préiwen, ob dat mat der EU-Direktive iwwert den elektronesche Commerce kompatibel wier.