Nach e Samschdeg den Owend huet déi britesch Regierung an engem Bréif ugefrot, fir den Delai vum Brexit no hannen ze verréckelen.

Am Kader vun der Brexit-Debatt krut den Donald Tusk am Ganzen 3 Schreiwessen. Aus britesche Regierungskreesser heescht et, datt de Premier Boris Johnson den éischten offizielle Bréif net soll ënnerschriwwen hunn, an deem en neien Austrëttsdatum ugefrot gëtt.

E Samschdeg den Owend huet den Donald Tusk offiziellt confirméiert, datt hien d'Demande vun der britescher Regierung kritt hätt. Et kéint awer e puer Deeg daueren, bis d'Regierungschefe vun den EU-Memberstaaten eng Decisioun getraff hätten. Hien huet allerdéngs näischt zu der Ënnerschrëft gesot, déi feele soll.

An engem zweete Schreiwes soll den Johnson matgedeelt hunn, datt hien géint d'Verréckele vum Brexit-Austrëtt wier.

De briteschen EU-Botschafter Tim Barrow huet an engem drëtte Schreiwes betount, datt den éischte Bréif nëmme verschéckt gouf, fir net géint d'Gesetz ze verstoussen.

Brexit-Vott verréckelt

Um "Super Saturday" huet dat britescht Parlament decidéiert, de Brexit-Vott op nächst Woch ze verréckelen.

Am grousse Ganze war et eng méi aussergewéinlech Sëtzung: Zanter 37 Joer, d.h. zanter dem Falkland-Krich, souz d’House of Commons net méi op engem Samschdeg zesummen. D’Ursaach vum neie Retard ass, dass d’Ratifizéierungsgesetz nach net gestëmmt ass.

De Boris Johnson huet e Samschdeg matgedeelt, dass hie wéi geplangt um 31. Oktober géing festhalen, och d'Gesetz kéint hien net dozou zwéngen, méi spéit aus der EU auszetrieden, sou de britesche Premier. Dem Gesetz no muss de Boris Johnson eng Verlängerung vum Delai ufroen. Et besteet awer nach d'Chance, dass den Deal matzäit kéint duerchgefouert ginn.

Britescht Parlament verréckelt Brexit-Ofstëmmung / Rep. Petz Bartz (19.10.19)
Um "Super Saturday" huet dat britescht Parlament decidéiert, de Brexit-Vott op nächst Woch ze verréckelen.

Oflaf vun der Sëtzung

Ëm 10.30 Auer goung déi historesch Sëtzung zu Westminster un. De Premier Boris Johnson huet vill Reklamm fir säin Deal gemaach, deen an de leschten Deeg mat der EU ausgehandelt gouf.

Am Ganzen hunn 322 Deputéiert fir dem Oliver Letwin seng Demande gestëmmt, déi de Boris Johnson dozou zwéngt, bei der EU en Delai bis den 31. Januar unzefroen. 306 Deputéiert hunn dogéint gestëmmt. De Letwin wollt domatt verhënneren, dass et net awer nach zu engem ongeregelte Brexit kënnt, wann déi Deputéiert et net géingen hikréien, d'Ännerunge bis den 31. Oktober am Parlament duerchzekréien.

Et gouf stonnelaang vehement debattéiert, ier decidéiert gouf, datt d'Brexit-Ofstëmmung verréckelt géing ginn. Et war ongewëss, ob den Deal duerchkomme géing.

Am Virfeld goufen et scho Pläng, fir de Vott ze verréckelen

Déi oppositionell Labour-Partei wollt eng Demande ënnerstëtzen, fir de Vott iwwert de Brexit ze verréckelen. D'Oppositioun hat annoncéiert, net matzespillen. Och de Koalitiounspartner DUP hat jo scho wësse gedoen, den Deal ze refuséieren, dee wier net gutt fir Nordirland.

De Labour-Chef Jeremy Corby huet dem Regierungschef reprochéiert, datt en den Deal nach méi schlëmm gemaach hätt, international Standarde géingen erof gesat ginn, aarm Regioune géinge méi aarm ginn. Et kéint een dem Boris Johnson kee Wuert gleewen.

Anti-Brexit-Manifestatioun

Virun der Dier vum Parlament haten eng honnertdausende Leit un enger Anti-Brexit-Manifestatioun deelgeholl, si verlaangen en neie Referendum. D'Campagne "People's Vote" plaidéiert dorfir, net eleng d'Parlament, mä och d'Vollek iwwert d'Ofkommes ofstëmmen ze loossen, dat de Premier Boris Johnson mat der EU um Sommet zu Bréissel ausgehandelt huet.