"Ech hu mech uerdentlech dru ginn, a wann der méi dat maache géifen, da wier villes besser."

Dat ass dem EU-Kommisiounspresident Jean-Claude Juncker säi Fazit gewiescht iwwer seng Zäit zu Bréissel, um Dënschdeg a senger leschter Ried am Europaparlament zu Stroossbuerg.

De Jean-Claude Juncker zitt Bilan

© AFP

Als Reussitte vu senger Kommissioun huet de Jean-Claude Juncker den no him benannte „Juncker-Plang“ genannt, deen eng Millioun Emploie bruecht hätt an och d'Léisung an der Griichenland-Kris.

Enttäuschunge ware fir de fréiere Lëtzebuerger Premier d'Zypern-Fro, an datt et nach ëmmer keng Union bancaire an der EU gëtt, well déi wier iwwerliewenswichteg fir d'Unioun.

Hien huet, mat Emotiounen, all senge Kommissäre Merci gesot. Ouni si hätt seng EU-Kommissioun net kënne funktionéieren a sou gutt schaffen.

D'EU huet dem Jean-Claude Juncker no, alles gemaach, fir en anstännegen, gereegelten Austrëtt vu Groussbritannien. Elo läit et um britesche Parlament, ob et den neien Accord unhëlt oder net. Dat sot de Jean-Claude Juncker och um Dënschdeg de Moien am Europaparlament. De Brexit war eng Zäit- an eng Energieverschwendung. Hie géif de Brexit ëmmer bedaueren, huet den Nach-Komissiounspresident weider gemengt.

De Rotspresident Donald Tusk huet zouginn, d'Situatioun wär komplex. Hie wëll an den nächsten Deeg decidéiere wéi et weider geet. Groussbritannien huet jo de Weekend op en Neits gefrot, fir de Brexit ze verréckelen.

No senger Ried huet de Jean-Claude Juncker de Parlamentarier op hir Froen geäntwert. U sech soll seng Mandatszäit den 31. Oktober op en Enn goen. Bis seng Nofolgerin Ursula von der Leyen de Posten iwwerhëlt, bleift de Jean-Claude Juncker awer nach Kommissiounspresident.

Dat dierft op d'mannst nach ee Mount daueren. Dëse Retard huet domat ze dinn, dass d'Personalien an där zukünfteger Kommissioun nach net all gekläert sinn. Frankräich, Rumänien an Ungarn mussen nämlech nei Kandidate presentéieren. Ënner Ëmstänn kéint déi nei Kommissioun den 1. Dezember ufänke mat schaffen.

D'Ursula von der Leyen war schonn am Juli vum Europaparlament confirméiert ginn. Déi designéiert Kommissären mussen allerdéngs hir Auditiounen an den zoustännege parlamentaresche Kommissioune packen. Déi huet den Nicolas Schmit, dee fir Lëtzebuerg an der neier Kommissioun soll sëtzen, schonn hannert sech. Den LSAP-Politiker a fréieren Aarbechtsminister soll an Zukunft zoustänneg si fir de Volet Beschäftegung.