De Réckbléck op seng Carrière, de Brexit an d'Populiste si Sujeten am groussen RTL-Interview mam Jean-Claude Juncker.

De Brexit mécht d'Leit duercherneen, mengt de Jean-Claude Juncker am Interview mat RTL, kuerz no der leschter Ried als Kommissiounspresident. Hie wier awer ee vun den eenzegen deemools gewiescht, deen dovunner ausgaangen ass, datt de Referendum iwwert de Brexit negativ géif ausgoen. Vun engem zweete Referendum geet hien dann och net aus. Elo hunn d’Britten domadder ze kämpfen.

De Brexit hätt fir keen een Avantage, och net fir d’europäesch Unioun. Och déi géif finanziell gesi verléieren, och am Fall, wann den haarde Brexit evitéiert kéint ginn. Fir de britesche Premier Boris Johnson fënnt de Jean-Claude Juncker deemno däitlech Wierder. Esou wéi de Boris Johnson mat sengen Deputéierten am House of Commons géif ëmgoen, wier an net villen anere Länner méiglech, esou den EU-Kommissiounspresident. Ma hien hätt mat ville Leit ze dinn, déi dem Boris Johnson sengem Kaliber géifen entspriechen, zum Beispill den Donald Trump. Um internationale Parquet hätt sech den Toun geännert.

Hie géing bereien, datt hie wärend der Brexit-Campagne net agegraff hätt, esou de Jean-Claude Juncker. Lige wieren deemools verbreet ginn, keen hätt awer de Mond opgemaach, an do hätt hie missen aktiv ginn. Ma hien hätt dem fréiere Premier David Cameron versprach, sech erauszehalen. Vum aktuelle Premier Boris Johnson seet de Jean-Claude Juncker, datt esou wéi deen seng Deputéiert zu Westminister géif behandelen, dat an den anere Länner esou net akzeptéiert géif ginn. Och wann dat britescht Parlament an d'EU Parlament de Brexit géife guttheeschen, géif dat nach net bedeiten, datt dee séier evacuéiert kéint ginn. "Dann ass nach net erleedegt. Da brauche mir nach e puer Jore mat deene Geschichten, déi domadder zesummenhänken. Do sinn nach Detailfroen. Eng 20.000 Gesetzer, 600 international Verträg, déi d'Englänner da net méi hunn. Si mussen och nei Handelsverträg aushandelen. Wann et schif geet, muss den EU-Conseilspresident Donald Tusk decidéieren, ob en nach eng Sitzung vum Rot arifft, an da muss decidéiert ginn, ob ee méi eng laang Period accordéier", sou de Juncker.

“Et duerf ee sech net infizéiere loosse vun engem falsche Behuelen”, esou de Jean-Claude Juncker an deem Kontext. Hie kéint net zum Donald Trump soen, elo géif een net méi matenee schwätzen. Et misst ee sech op esou een Toun astellen an net dovunner beandrocke loossen.

Jean-Claude Juncker: "An der europäescher Unioun hu mir Reegelen, et gi Länner, déi setzen d'Decisioun, wat Flüchtlingen ugeet, net ëm. Déi hunn ech viru Geriicht geholl. International hu mir dat net an deem selwechte Mooss. Do hu mir just d'Welthandelsorganisatioun, wou mir eis mat den Amerikaner virun engem Riichter kënnen auserneesetzen. Europa ass eng Rechtsgemeinschaft. International Gemeinschaft ass dat nach net am selwechte Mooss. Mee da muss een d'Leit huelen, wéi se sinn. Ech kann net zum Här Trump soen, elo geet et mir duer, elo schwätzen ech net méi mat dir. Elo spillen ech net méi mat dir. Eraus aus der Sandkëscht. Hien hëlt vill Plaz an der Sandkëscht, also muss ee sech dorobber astellen an net beandrocke loossen."

Jean-Claude Juncker

D’Populiste selwer wiere keng Gefor, esou de Jean-Claude Juncker. D’Gefor wier dann awer reell, wann déi Gehéier bei de Leit fannen. Si wiere vläicht déi déi richteg Froe géife stellen, mee keng richteg Äntwert géife ginn. An d’Gefor géif och vun der Vereinfachung vun der Politik ausgoen. D’Politik wier awer ee komplext Konstrukt. D’sozial Medien géifen déi Vereinfachung stäerken.

D’Bäitrëttsverhandlunge vun der Tierkei an d’europäesch Unioun dann: Do mengt de Jean-Claude Juncker, datt d'Tierkei nach laang net bäitrëttsräif wier, well d’Tierkei, esou wéi d’Situatioun sech géif stellen, net kéint an d’EU opgeholl ginn, besonnesch no den Evenementer déi leschte Wochen a Méint.

Jean-Claude Juncker: D'Tierkei huet, nodeems den Erdogan 2002 d'Wale gewonnen huet, substantiell demokratesch Fortschrëtter gemaach, mee duerno sinn erëm al Reflexer an der Tierkei wakereg ginn. Aus Grënn, déi ech net richteg novollzéie kann. Ech si peinlech beréiert, et stéiert mech, wann ech gesinn, datt elo an der Tierkei grouss Krichsbegeeschterung herrscht an allen Secteuren vun der politescher Landschaft. D'Leit applaudéieren den Zaldoten, Fussballspiller salutéieren, alles dat sinn Zeenen, déi mech un däischter Zäiten erënneren.

Jean-Claude Juncker 2

Et ass, wéi gesot, ee nodenkleche Jean-Claude Juncker, dee säi Kommissiounsposte raumt. Besonnesch belaaschtend wieren d'Aarbechtszäiten an d'Imprevuen, ma hien hätt ëmmer alles ginn: Ech hu mech beméit, d'Resultat ass do oder net do, mee méi kann ee net maachen, wéi dat, wat ech gemaach hunn.