Une dernière pour la route: De Jean-Claude Juncker huet zu Bréissel seng lescht Pressekonferenz als President vun der EU-Kommissioun ginn.

Depart vum Jean-Claude Juncker / Reportage Maxime Gillen

13.20 Auer e Freideg de Mëtteg. De Jean-Claude Juncker verléisst d’Europäesch Bün. Net ouni nach e puer där typescher Juncker-Picke placéiert ze hunn. Vum bis elo eenzege Spëtzekandidat, dee Kommissiouns-President gouf, bis zum leschten Europäer am Amt, deen och perséinlech de Vertrag vu Maastricht ënnerschriwwen huet. En Äddi, net ouni Emotioun. Direkt am Ufank vum leschte Briefing vun der Kommissioun "Juncker" hat de bal 65 Jore ale Vollblutt-Politiker selwer gesot: "Haut gëtt net gekrasch."

Dat ass eng gewëssen Trauregkeet, well eng wichteg Etapp vum Liewen op en Enn kënnt. Et ass och eng grouss Erliichterung, well dat ass keng einfach Aarbecht gewiescht. Also déi zwou Saachen, déi knuppen aneneen, sou de Jean-Claude Juncker den Ament, an deem hien de Pressesall eng leschte Kéier verlooss huet.

Nëmme 17 Deeg no senger Operatioun, wéinst enger Arterien-Erweiderung am Häerzberäich, huet de Lëtzebuerger drop gehalen, Bréissel net ze verloossen, ouni e leschten "Ciao Ciao."

Finanzminister, Premier, Chef vum Eurogrupp a President vun der EU-Kommissioun: Wärend 30 huet de Jean-Claude Juncker d’Europa vun haut mat gestallt.

D'Geschicht wäert hei d'Urteel ginn. Well Dir wäert doudsécher eng wichteg Plaz an där vun Europa kréien. Keen anere war esou engagéiert, konstant am Déngscht vum Europäesche Projet, wéi Dir, sou de Lorenzo Consoli vun der International Press Association.

E Samschdeg schléit d’Stonn vun der Pensioun. Oder awer net? D’Zäit, fir dat Erlieften an Dosenden Anekdoten op Pabeier ze bréngen?

De Jean-Claude Juncker zéckt: Wat ech genau elo an den nächste Wochen an Deeg maachen, weess ech éierlech gesot nach net. Mais iergendwann schreiwen ech.

Bréissel an dem Gebai vun der EU-Kommissioun wäert de Jean-Claude Juncker nach net direkt de Réck dréien. Um 8. Stack waart nach de Büro. Ma firwat eigentlech?

Ech kréien hei e Büro am Gebai. Net sou grouss wei deen, deen ech elo hunn. Well d'Kommissioun decidéiert huet, datt déi fréier Presidenten eng kleng administrativ Hëllef kréien, well se musse jo nach vill fir Europa schwätzen. Zu Lëtzebuerg hunn ech e Büro als fréiere Premier an ech deele meng Zäit op déi zwou Plazen op, sou de Jean-Claude Juncker. 

Den onvergläichleche Jean-Claude Juncker am Portrait

D'Kolleege vum RTL 5 Minutes hunn de Parcours vun engem onvergiesslechen an aussergewéinlechen EU-Kommissiounspresident an engem Video zesummegefaasst.

D'Pressekonferenz am Replay

Fir d'éischt hu seng Spriecher geschwat, du koum de Jean-Claude Juncker op d’Bün a krut an engem gutt gefëllte Sall Applaus, och vun de Journalisten. D’Froe vun der Press waren an engem éischter lockeren Toun an anekdotesch. De Jean-Claude Juncker war gutt gelaut an huet probéiert, subtil Äntwerten ze ginn. Wou hien elo an Zukunft wäert sinn - Bréissel oder Lëtzebuerg – wollt hien net verroden. A béide Stied kritt hien e Büro.

Um Schluss sot de Jean-Claude Juncker "Ech muss elo fort, ech hunn Honger (...) Allez ciao ciao“, huet nach fir puer Fotoe poséiert, krut Blummen a war du séier fort.

Op d'Fro, wat hie senger Nofollgerin réit, huet hie geäntwert, dass hien hir just géif soen, si soll op Europa oppassen. Hie gëtt iwwert de Weekend vum Ursula Von der Leyen ofgeléist.