Déi grouss Iddi war et jo, dass sech d'Memberlänner eens ginn, dass d'ganz EU bis d'Joer 2050 soll klimaneutral ginn. Polen huet dat awer blockéiert.

EU-Sommet um Freideg
Déi grouss Iddi war et jo, dass sech d'Memberlänner eens ginn, dass d'ganz EU bis d'Joer 2050 soll klimaneutral ginn. Polen huet dat awer blockéiert.

Well Warschau fir den Ament net gesäit, wéi een dat Zil erreeche soll, hu si en Delai gefrot. D'Wirtschaft a Polen, déi haaptsächlech mat Kuel funktionéiert, wier bis dohinner net prett. D'Gespréicher zu Bréissel hu bis an d'Nuecht era gedauert.

D'EU-Kommissiounspresidentin Ursula von der Leyen huet iwwerdeems erkläert, datt hir Kommissioun am Mäerz een entspriechend Klimagesetz wéilt op den Dësch leeën. An do kéint Polen dat och net blockéieren, well dofir keng Unanimitéit néideg wier.

EU-Sommet 1. Dag / Reportage Claudia Kollwelter

Schonn am Virfeld hate sech d'Diskussioune méi schwiereg annoncéiert, well nieft Polen och Ungarn an Tschechien Widderstand geleescht haten an europäesch Hëllefe fir d'Atomenergie gefuerdert hunn. E Punkt, dee fir de Lëtzebuerger Premier Xavier Bettel net a Fro koum. Et gouf festgehalen, dass fir verschidde Länner d'Nuklearenergie en Deel vun hirem nationale Mix kéint sinn. De Xavier Bettel jugéiert de Refus vu Polen iwwregens als verständlech. Et wier och konstruktiv, dass gesot gouf, dass ee méi Zäit bréicht, an net kategoresch refuséiert.

Der Ëmweltorganisatioun Greenpeace no ginn d'Mesuren, déi vun den EU-Memberstaaten um Sommet zu Bréissel geholl goufen, net wäit genuch. Zwar wier et gutt, datt ee bis 2050 wëll klimaneutral sinn, allerdéngs misste méi séier Mesurë geholl gi mat Bléck op déi grouss Urgence. Greenpeace kritiséiert och d'Positioun vum franséische President Emmanuel Macron. Um Sommet gouf nämlech festgehalen, datt d'Atomkraaft um Wee a Richtung Klimaneutralitéit och eng méiglech Energiequell wier. D'Nuklearenergie awer géif d'Entwécklung vu wierkleche Léisungen ofbremsen.

Anere Sujet war dann nach de pluriannuelle Budget vun 2021 un. Doriwwer gouf awer net esou laang debattéiert, vue datt ee sech vun Ufank un net eens war. Den EU-Rotspresident Charles Michel soll dowéinst an den nächste Méint bilateral Gespréicher féieren, fir op deem Punkt weider ze kommen.

Nom Wal-Resultat a Groussbritannien an dem Brexit, deen doduerch elo an d’Haus steet, wäert dësen dann och um 2. Dag vum Sommet ee vun den Haaptsujete sinn. E Freideg de Moien huet d'Europäesch Unioun eng séier Ratifizéierung an Ëmsetzung vum Brexit-Accord gefuerdert. D'Staats- a Regierungscheffen hunn donieft am Ofschlossrapport betount, an Zukunft enk Relatioune mat Groussbritannien wëllen ze hunn. Et gëtt do vum sougenannten "Level Playing Field" geschwat.