An der Affär ëm déi europäesch Biergerinitiativ "Uno di noi" (Ee vun eis) huet den europäesche Geriichtshaff decidéiert, dass hire Recours rejetéiert gëtt.

Si hate méi wéi eng Millioun Ënnerschrëften a méi wéi 7 Länner an Europa gesammelt. Ma um Enn sollt dat net duergoen, fir déi europäesch Kommissioun ze forcéieren, hir Fuerderung och ëmzesetzen. E Grupp vu Leit hat eng europawäit Petitioun lancéiert, géint Ofdreiwung an d'Zerstéiere vun Embryoen, zum Beispill an der Recherche. Nodeems déi europäesch Kommissioun hir Fuerderung awer net zeréckbehalen huet, sinn d'Initiateuren domat viru Geriicht gaangen.

Ma och dat sollt hinnen um Enn net hëllefen. Den europäesche Geriichtshaff huet nämlech decidéiert, dass d'Kommissioun net obligéiert ass, dëser Fuerderung nozekommen, wéi de Spriecher vun der Cour, Antoine Briand, erkläert.

Extrait Antoine Briand

Hannergrond vun der Affär ass eng Petitioun, eng sougenannt europäesch Biergerinitiativ, mam Numm „Uno di noi“, also „Ee vun eis“. D'Petitionäre fuerderen, dass Ofdreiwungen an d'Zerstéiere vun Embryoe verbuede ginn an deemno och net méi vun der EU finanziell ënnerstëtzt ginn. Ma obschonn d’Petitioun déi néideg Ënnerschrëfte kritt hat an dann och der europäescher Kommissioun presentéiert gouf, huet dës decidéiert, an där Fro net aktiv ze ginn.

Et dierft net iwwerraschen, dass d'Petitionäre net zefridde ware mam Resultat vun hire Beméiungen a géint dës Decisioun Recours agereecht hunn. Domat sinn se dunn duerch all Instanze gaangen a sinn um Enn virum ieweschten europäesche Geriicht gelant. An dat huet wéi gesot decidéiert, dass de Legislateur, also d'Kommissioun, Fuerderunge vu Petitiounen net muss nokommen.