Kroatien huet zanter e Mëttwoch d'EU-Presidence iwwerholl a stellt déi ënnert de Motto "Ee staarkt Europa an enger Welt, déi sech wandelt".

Et dierfte gréisser Defien op Kroatien duerkommen. 2013 ass d'Land Member vun der europäescher Unioun ginn. Zanter e Mëttwoch huet et d'EU-Presidence iwwerholl an dat wäert eng grouss Aufgab fir de jéngsten EU-Member ginn. Ënnert anerem wéinst dem Brexit, deen den 31. Januar an d'Haus steet.

Kroatien EU-Presidence/Reportage Nadine Gautier

"Ee staarkt Europa an enger Welt, déi sech wandelt". Dat ass de Motto vun der kroatescher EU-Presidence, déi sech iwwert 6 Méint zéie wäert. An déi Presidence fänkt schonn domadder un, datt Enn vun dësem Mount d'Britten aus der europäescher Unioun solle klammen. De kroateschen Ausseminister Radman huet e Mëttwoch fir den Optakt vun der Presidence an deem Kader vu vill Aarbecht a wichtegen Aufgabe geschwat. D'Land misst sech virop ëm d'Organisatioun vun de Relatiounen tëscht der Unioun a Groussbritannie këmmeren. An enger Iwwergangsphas, déi bis d'Enn vum Joer dauere soll, solle jo déi wirtschaftlech Relatiounen tëscht der EU an der brittescher Insel gekläert ginn.

Een anere Punkt wärend der Presidence wäert d'EU-Erweiderung sinn. Nordmazedonien an Albanien wéilten der europäescher Unioun bäitrieden. Frankräich blockéiert d'Bäitrëttsverhandlungen awer, well Paräis der Meenung ass, datt den Erweiderungsprozess misst reforméiert ginn. Der Televisiounschaîne N1 sot de Minister Radman, datt et "ënnerschiddlech Manéiere géif ginn, fir un d'Saach erunzegoen". Op engem West-Balkan-Sommet am Mee dëst Joer soll hei eng Léisung fonnt ginn.

Seng Regierung géif dat ënnerstëtzen, wat "realistesch a méiglech" wier. Och säi Land Kroatien hätt viru Jore missten "haart schaffen, fir all d'Critèren an Normen ze erfëllen", esou de Radman. Och wa mat Nordmazdounien an Albanien keng Bäitrëttsverhandlungen am gaange sinn, gesäit dat aneschters fir Serbien an de Montenegro aus, mat deenen esou Gespréicher gefouert ginn.

Demographie ass ee weidere Sujet, deen de Kroate besonnesch um Häerz leit. Besonnesch d'Länner am Südoste vun Europa leiden dorënner, datt ëmmer manner Kanner gebuer ginn a vill Leit auswanderen. Do sinn d'Zuele vun de Populatioune massiv zeréckgaangen. Och Kroatien ass dovunner betraff. Bis 2050 kéint d'Land 17 Prozent vu senger Bevëlkerung verléieren, esou d'Donnéeë vun der UN.

Fir déi zweet Hallschent vum Joer iwwerhëlt iwwregens Däitschland d'EU-Presidence.