Am Kader vun hirer Tournee duerch Europa, war déi nei EU-Kommissiouns-Cheffin Ursula Von der Leyen um Méindeg op Visitt hei zu Lëtzebuerg.

De Premier Xavier Bettel huet vollst Vertrauen an déi nei EU-Kommissioun von der Leyen. Dat sot hien e Méindeg de Moien op der Pressekonferenz no senger Entrevue mat der Ursula von der Leyen. Déi nei EU-Kommissiounspresidentin, huet Lëtzebuerg gelueft, fir seng gerecht Politik. Den gratis ëffentlechen Transport zum Beispill géif si sech och an anere Länner wënschen. An bei de Finanze wär Lëtzebuerg e Pionéier bei der Klimafinanzéierung.

Extrait Ursula von der Leyen

D'Ursula von der Leyen begréisst, dass et eng Wafferou a Libyen gëtt. Dës Wafferou wär awer just en Ufank. Libyen misst no an no nees nei opgebaut ginn. D'Land bréicht eng Regierung, déi d'Land nees zesummeféiert. Dëse Prozess misst vun de Vereenten Natioune geleet ginn, well vill Länner hir Interêten an der Regioun vertriede géifen an dat net onbedéngt zu Gonschte vun den libesche Bierger, esou d'Ursula von der Leyen.

Effektiv wäert dës Kommissioun en Dënschdeg en ambitionéierte Budget presentéieren, fir géint de Klimawandel ze schaffen. 1 Billioun Euro an engem Joerzéngt wéilt ee fir den sougenannten Green Deal opbréngen, esou war et e Méindeg de Moien am Spiegel ze liesen.

Déi nei EU-Kommissiounspresidentin hat dann och nach eng Entrevue beim Grand-Duc.

Um 15 Auer gouf déi nei Kommissioun vu 27 Kommissären iwwerdeems an enger feierlecher Zeremonie um Europäesche Geriichtshaff hei um Kierchbierg vereedegt. Si hunn dobäi den Eed ofgeluecht, am Sënn vun den EU-Verträg a fir d’Wuel vun der Allgemengheet ze handelen.

EU-Kommissärin zu Lëtzebuerg
Am Kader vun hirer Tournee duerch Europa, war déi nei EU-Kommissiouns-Cheffin Ursula Von der Leyen um Méindeg op Visitt hei zu Lëtzebuerg.

An engem Tweet um Méindeg am Nomëtteg huet d'Ursula von der Leyen hire Lien mat dem Grand-Duché erkläert. Hire Papp huet hei geschafft, 2 vun hire Bridder sinn hei gebuer.