Et stinn haart Verhandlungen an d’Haus, tëscht der EU a Groussbritannien, iwwert déi zukünfteg Relatiounen nom Brexit.

Et gi laang an zéi Verhandlungen, wann déi nächst Méint iwwert e Wueren-Accord tëscht dem Net-EU-Member Groussbritannien an der EU wäert gestridde ginn.

D'Eckpunkte vun der EU-Positioun fir dëst Fräihandelsofkommes huet de Michel Barnier um Méindeg de Moie presentéiert a vun engem ambitionéierten Accord geschwat, dee géif ugestrieft ginn.

Den Accès fir brittesch Produkter a Servicer an den EU-Bannemäert géif awer dovunner ofhänken, wéi enk sech wäert Groussbritannien un europäesch Normen a Standarden halen.

Op deem Punkt hat de briteschen Premier Johnson ewell deklaréiert, datt säi Land ënner kengen Ëmstänn méi wéilt un Norme fir den Droit de Travail oder fir Ëmweltschutz a staatlech Wirtschafts-Subventioune festhalen.

De Barnier huet dann e Méindeg de Moien och kee Blat virun de Mond geholl a sot, datt och dat bescht Ofkommes ni méi esou gutt wier, wéi d'Relatiounen, déi et bis ewell tëscht Groussbritannein an der EU ginn hätten. Ënnert anerem misst sech op Douane-Formalitéiten agestallt ginn.

All brittesch Wueren, déi an d'EU géifen agefouert ginn, géifen dann och vun der Douane kontrolléiert ginn. "Oppe Grenzen" wieren elo passé!

Ee vun den därege Punkten betrëfft d'Recht, fir virun der brittescher Küst ze fëschen: wann op dësem Punkt keen Accord fonnt gëtt, ass et fir europäesch Fëscher verbueden, fir am brittesche Mier ze schaffen.

Wéi de Barnier betount huet, misst de géigesäitegen Accès zu de Souveränitéitsgebidder am Mier, esouwuel fir brittesch an och europäesch Fëscherbooter garantéiert bleiwen.

No 47 Joer hat Groussbritannien jo d'EU an der Nuecht op e Samschdeg verlooss.

Praktesch huet sech awer nach näischt geännert, well Iwwergangsreegele fir all EU-Bestëmmunge bis den 31. Dezember gëllen.

De Michel Barnier ass iwwerdeems an enger Woch op offizieller Aarbechtsvisitt zu Lëtzebuerg: esouwuel d'Regierung wéi och d'Chamber ginn dann iwwert d'europäesch Verhandlungs-Strategie mat GB an d'Bild gesat.

Boris Johnson: Groussbritannien léisst Muskele spillen, déi ee Joerzéngten net gebraut huet

Zäitgläich zum Michel Barnier zu Bréissel hat de britteschen Premier Johnson d'Press zu London e Méindeg de Moien convoquéiert.

Thema: den Brexit Trade Deal, deen elo muss verhandelt ginn.

Nach eemol huet den Johnson kloer gemeet, datt hie mam neien Handels-Accord keen Alignement un EU-Reegele wéilt ustriewen. Senge Wierder no, misst de neien Deal, déi nei Relatiounen iwwert den Handel erausgoen.

Als Beispill sot den Tory-Politiker, datt hien en Accord an der Aviatioun wéilt, sou datt et weider bëllech Flich tëscht der EU an der brittescher Insel kéinte ginn.

Och mat engem Fëscherei-Accord seet sech den Johnson averstanen, mä en Deal, dee Groussbritannien als fräie Küstestaat respektéiert, dee säi Mier och selwer kontrolléiert, sou datt all Joer d'Fëscherei-Quote missten nei verhandelt ginn.

Interessant och d'Ausso vum Johnson, datt lo och wäerten Accorden mat deene Länner verhandelt ginn, deenen Groussbritannien an de 70er Joren, wéi den EU-Bäitrëtt also war, nach de Réck gedréint huet.

Wuertwiertlech sot den Johnson, datt säi Land lo géif Muskele spillen loossen, déi een zanter Joerzéngten net méi gebraucht hätt.

Dat hätt dann zum Effekt, datt Groussbritannien, och ouni an der EU ze sinn, an Zukunft méi Schëffer, méi Fleesch an och méi Parzeläin wäert verkafen, sou den Johnson viru Journalisten um Méindeg de Mëtteg.