Zu Lëtzebuerg sollen op en Neits Biergerdialoger zesumme mat Vertrieder vun der Europäescher Kommissioun organiséiert ginn.

Dat en Vue vun enger grousser Konferenz iwwert d'Zukunft vun Europa. Dat huet de Premier Xavier Bettel e Mëttwoch de Mëtteg an der Chamber op eng Question élargie vun der CSV-Deputéiert Viviane Reding geäntwert.

Dës Konferenz soll um Europadag den 9. Mee lancéiert ginn, déi dann iwwer zwee Joer wäert lafen. D'Iddi dohannert ass et mat de Bierger zesummen ze decidéieren, wéi déi Europäesch Unioun vu muer soll ausgesinn. Ma d'Positioun vu Lëtzebuerg heizou wier bis ewell nach ëmmer onkloer, esou d'Kritik vun der Viviane Reding.

Lëtzebuerg hätt sech vun Ufank un aktiv abruecht a wier am Gaangen eng gemeinsam Positioun mat Holland an der Belsch auszeschaffen, esou de Xavier Bettel. Déi kroatesch Presidence krut iwwerdeems d'Mandat eng Positioun vum Conseil ze formuléieren. Zu de Sujeten, déi op der Konferenz sollen diskutéiert ginn, gehéieren eng gemeinsam Klima- an Energiepolitik, de Rechtsstaat, d'Fräiheeten an d'Rechter vun de Bierger oder d'Digitaliséierung.

D'Initiativ fir dës Diskussioun koum vum CSV-Deputéierte Claude Wiseler. Hien huet sech skeptesch gewisen, wat dës Konferenz ugeet, ma gesäit awer positiv, dass d'Initiativ aus dem Conseil kënnt. Ëmmerhi wier et bis ewell meeschtens de Conseil gewiescht, dee gréisser Reformprojete gebremst huet. Fir déi Gréng ass et wichteg, dass d'Zivilgesellschaft an dëse Prozess mat agebonne gëtt. Dozou géifen och gemengnëtzeg Organisatiounen a Wëssenschaftler gehéieren. Ausserdeem missten d'Bierger och den Ordre du Jour vun dësen Diskussioune kënne matbestëmmen, esou déi gréng Deputéiert Stéphanie Empain. „Ech denken hei un Themen, wéi de Plastikverbuet. Engem Thema, dat ville Leit um Häerz läit a wou et wichteg wier, dass eng ambitionéiert europäesch Léisung fonnt gëtt, déi wäit iwwert dat eraus geet, wat aktuell um Dësch läit. D'Bierger géifen esou e wichtege Sujet eng aner Urgence zouweisen, wéi dat aktuell de Fall ass.“Fir de Gusty Graas vun der DP ass kloer, dass bei dëser Konferenz och Froen, wéi déi vun der Stëmmverdeelung géifen opkommen, wat fir e klengt Land wéi Lëtzebuerg net esou evident ass. Ma fir verschidden Decisioune wier et awer wichteg sech net duerch d'Unanimitéitsreegel bremsen ze loossen.

"Och fir zum Beispill ze verhënneren, dass an Zukunft Länner, déi di elementar europäesch Wäerter net méi vertrieden... Grad do muss awer de Prinzip vun der Unanimitéit ofgeschaaft ginn, well soss verstoppen déi sech jo ëmmer do hannendrun. A se gi sech jo awer ganz vill zou a se wësse jo, si kënnen sech praktesch alles erlaben, wa keng Méiglechkeet besteet se ze bremsen oder Sanktiounen anzeféieren.“

De Fernand Kartheiser vun der Adr huet par konter ënnerstrach, dass déi final Decisiounen op europäeschem Niveau weider an den Hänn vun de Memberstaate solle bleiwen.

De lénken Deputéierte Marc Baum fënnt d'Initiativ iwwerdeems an der Theorie ganz luewenswäert, ma huet sech relativ skeptesch gewisen, ob dat esou ka funktionéieren. Esou richteg géif hien nach net gleewen, dass déi europäesch Bierger um Enn wierklech e Wuert matzeschwätzen hunn. Ëmmerhi wier de Biergerwëllen an der Vergaangenheet schonn dacks einfach ignoréiert ginn.

De Marc Baum gleeft net, dass dat dës Kéier wäert anescht sinn, wann bei der Konferenz Conclusioune sollten erauskommen, déi dem Conseil net an de Krom passen.