Zu Bréissel um Spezial-Sommet fir de Budget vun der Europäescher Unioun ass ee wéi an sech erwaart net op e gemeinsame Nenner komm.

D'Unioun huet also nach ëmmer kee Budget fir déi nächst 7 Joer. D'Differenzen tëscht de verschiddene Memberstaate waren einfach ze grouss. Et war e Sommet deen net vill Plaz fir Optimismus gelooss huet.
Et war kuerz virun 20 Auer ewéi den Lëtzebuerger Premier Xavier Bettel erof bei d'Press koum, an d'Catacombë vum Centre Lipsius.

''Ech kann iech net verstoppen, dass ech iwwer déi zwee Deeg enttäuscht sinn. Ech sinn heihin op Bréissel komm, well ech mir geduecht hunn, mir géifen eis déi néideg monetär Moyene ginn fir déi Ambitiounen déi mir eis selwer ginn hunn, kënnen ze erfëllen. Ech hat déi lescht Deeg awer schonn Echoe kritt, dass et éischter schwéier géif ginn, dass verschidde Länner awer op hire Positioune campéiere géifen, dass ee mat manner kéint méi maachen.''

De Xavier Bettel mengt, déi véier Staaten, déi hei zu Bréissel an Tëschenzäit déi véier knéckeg genannt ginn. Holland, Dänemark, Éisträich a Schweden. Si wollten op kee Fall méi Suen an d'europäesch Kees iwwerweisen. 17 aner Länner, déi sech déi ambitiéis Memberstaaten nennen, wollten de Prozentsaz deen all Land vu senger Wirtschaftsleeschtung muss abezuelen däitlech hiewen, op 1,3 Prozent. Vun do u gouf et zwee Extremer déi net méi konnten zesummebruecht ginn. De Xavier Bettel.

''Deen een huet fonnt et géif ze wäit goen, well esouguer ze vill Budget virgesi wär. An déi aner hu gesot, dass mir d'Ambitiounen hei wierklech verpassen.''

Och déi däitsch Bundeskanzlerin Angela Merkel huet zu deene gehéiert déi enger Erhéijung vun den Iwwerweisungen op Bréissel ganz kritesch géintiwwer stoung.

''Ich möchte jetzt hier von den Details gar nicht viel berichten, Die Differenzen waren einfach zu gross.''

An der Benelux ginn et verschidde Konzeptioune vun der EU, Xavier Bettel.

''Jo op verschidde Punkte si mir mam Benelux jo ganz oft eens, mä hei muss ech feststellen, dass meng Perceptioun vum europäesche Projet eng aner ass, wéi déi vum Mark Rutte, jo.''

Inakzeptabel wär et fir den Lëtzebuerger Premier allerdéngs, wa Länner déi ewéi Dänemark, déi net méi fir d'EU wëllen ausginn, weider Rabatter erausschloe wéilten.

''Dat heescht, dass ee géif soen haut Rabatter okay, dir hutt se, dann hal der se. Mee et muss eng Aussiicht sinn, wou et éischter e phasing out vu Rabatter ass, ewéi och se elo och nach wëllen ze festegen.''

Esou grouss d'Differenze sinn, an esou wéineg e geschlof muss hunn. De Rotspresident Charles Michel, deen dës Verhandlunge moderéiert hat, huet probéiert positiv ze bleiwen.

''We need more time''

Méi Zäit also fir an den nächste Wochen, en Budgetsplang unanime am Conseil kënnen unzehuelen.