Den Ausbroch vum Coronavirus huet déifgräifend Konsequenzen op d'Entreprisen an der Europäescher Unioun. Eng EU-wäit Strategie gëtt et awer net.

De Coronavirus gëtt ëmmer méi een Home-office-Experiment. Entreprisë wéi Google a Microsoft erlaben et hire Mataarbechter elo schonn, vun doheem aus ze schaffen, mä fir Entreprisen, déi net digital sinn a mat Clientë schaffen, stelle sech reell Froen.

AUDIO: Aarbechtsrecht Coronavirus / Rep. Bill Wirtz (6.3.2020)

Déi Lëtzebuerger Europadeputéiert Monica Semedo, Member vun der Kommissioun fir Aarbecht a Soziales am Europaparlament, erkläert, dass zu Bréissel hei keng Kompetenze leien. Dat wier weiderhin d'Responsabilitéit vun de Memberstaaten. D'DP-Politikerin seet och, dass Employéen net kënne wéinst Angscht virum Virus doheem bleiwen.

Wichteg wier elo net a Panik ze geroden, an am Fall, wou ee mengt, et wier ee Betraff, fir d'éischt engem Dokter oder dem 112 uruffen, ier ee sech bei een Dokter deplacéiert.

Een Debat iwwert eng EU-Strategie fir d'Grippebekämpfung wier jee nodeems och néideg. Fir d'Monica Semedo kënnt et net a Fro, fir am aktuelle Kontext de Schenge-Raum a Fro ze stellen. Eng Diskussioun iwwert de Coronavirus steet an der Plénière vum Europaparlament d'nächst Woch um Programm.

EZB test Home office

E Méindeg dierfen déi 3.700 Mataarbechter vun der Europäescher Zentralbank  de sougenannten "Home office" testen. D'Bank mécht en Test vun hirem Noutfallplang, deen a Kraaft géing trieden, wa sech ee vun hire Mataarbechter mam Coronavirus ugestach hätt. Et kéint nämlech sinn, dass e puer Leit, wann net esouguer alleguerte missten am Fall vun engem Corona-Infizéierte vun doheem aus schaffen.

Besonnesche Wäert gëtt op den Test vun der IT-Infrastruktur geluecht, dat heescht op Laptoppen an Dateniwwerdroung.