Déi ungaresch Fidesz-Partei vum Viktor Orban géing an d'Diktatur rëtschen, sou d'CSV.

Den CSV-Parteipresident Frank Engel an 10 aner Partei- a Regierungscheffe vun der konservativer EVP hunn den Ausschloss vun der ungarescher Fidesz-Partei vum Viktor Orban aus der EVP gefuerdert.

Op Facebook begréisst de Fränk Engel och d’Erklärung vun der Lëtzebuerger Regierung a vun den 13 anere Memberstaaten. Dem CSV-Parteipresident no géing Ungarn an d’ "Diktatur" rëtschen, wat net méi kompatibel mat europäesche Wäerter a Reegele wier.

Hei den Text vum Facebook-Post vum Fränk Engel

Ech si frou, datt d'Lëtzebuerger Regierung sech mat villen aneren an der EU zesummegedoen huet, fir ze verhënneren, datt an der sanitärer Kris de Rechtsstaat ausgehiewelt gëtt. D'CSV huet d'Krisegesetz bei eis matgestëmmt, well et proportionéiert a noutwenneg ass, an zäitlech begrenzt. Eise Rechtsstaat ass a kenger Weis a Fro gestallt. An Ungarn huet de Viktor Orban mat senger FIDESZ-Regierung an däer hirer parlamentarescher Majoritéit en zäitlech onbefristen Ausnamezoustand beschloss. Drakonesch Strofe sollen elo déi treffen, déi sougenannte "falsch Informatioune" verbreeden. Wat falsch ass, bestëmmt den Orban alleng. Ungarn rëtscht an d'Diktatur. Dat ass mat europäesche Wäerter a Regele net kompatibel.

Ech hunn duerfir haut mat zeng anere Partei- a Regierungscheffen aus der EVP e Bréif un eise President Donald Tusk ënnerschriwen, mat deem mer den definitiven Ausschloss vu FIDESZ aus der EVP fuerderen. D'Demokratie an de Rechtsstaat sti fir eis NIE zur Dispositioun.

14 EU Memberstaate wéinst Ungarn "zudéifst beonrouegt"

14 EU-Staate maache sech Suergen ëm d'Demokratie, wéinst de Mesuren déi géint de Coronavirus decidéiert goufen.
An enger gemeinsamer Erklärung – wou Ungarn awer net mam Numm genannt gëtt - schreiwen déi 14 Memberstaaten, et géing de Risiko bestoen, datt d’Prinzipie vu Rechtsstaat, Demokratie a fundamental Rechter verletzt ginn.

Krisemesurë missten an der Zäit an op dat, wat wierklech néideg ass, limitéiert sinn. Donieft solle se proportionell sinn a reegelméisseg kontrolléiert ginn. Meenungs- a Pressefräiheet dierften net ageschränkt ginn.

Ënnerschriwwen hunn nieft Lëtzebuerg: Frankräich, Däitschland, Italien, Spuenien, d’Belsch, Holland, Irland, Dänemark, Schweden, Finnland, Lettland, Griicheland a Portugal.