Wärend Wochen huet et esou ausgesinn, wéi wann d'Summervakanz dëst Joer fir déi meeschten Europäer géing an d'Waasser falen.

Mëttlerweil gëtt et awer deen een oder anere Liichtbléck. D'EU-Kommissioun huet nämlech eng Partie Reegelunge presentéiert, fir den Tourismussecteur an der EU lues awer sécher nees unzekuerbelen. "Mir wäerten definitiv am Summer eng Touristesaison hunn, allerdéngs mat Sécherheetsmoossnamen an Aschränkungen", sou den EU-Wirtschaftskommissär Paolo Gentiloni der "Süddeutschen Zeitung" géintiwwer.

Den EU-Wirtschaftskommissär huet och erkläert, datt d'Tourismusbranche méi ewéi all anere Secteur ënnert der Pandemie ze leiden hätt. Dowéinst wäert dee Secteur och mat am meeschte vun der EU gehollef kréien, sou den Gentiloni am Interview an der "Süddeutschen Zeitung".

Um Mëttwoch huet d'EU-Kommissioun hir Recommandatiounen un d'Memberlänner fir den Tourismus presentéiert, mat, ënnert anerem Sécherheetsmesuren an den Hoteller.

Reouverture vu Grenzen

A villen EU-Länner sollen d'Grenzkontrollen an den nächste Wochen ofgeschaaft oder virsiichteg erofgeschrauft ginn. Dës soll awer just fir déi Länner gëllen, an deenen eng änlech epidemiologesch Situatioun herrscht. Donieft heescht et vun der EU-Kommissioun, dass genuch Tester a Capacitéiten an de Spideeler mussen do sinn. Wichteg ass och, dass a béide Staaten änlech Hygiènesmesurë gëllen an de Social Distancing agehale gëtt vun den Touristen.

Donieft huet d'EU-Kommissioun och betount, dass et keng Zwou-Klasse-Gesellschaft wärend der Summervakanz dierf ginn, dat heescht, dass Awunner aus engem bestëmmten EU-Memberstaat net dierfen diskriminéiert ginn. Wann e Land seng Grenzen zu engem anere Land opmécht, muss dat "ouni Diskriminéierung fir all Mënsche gëllen, déi an deem Gebitt wunnen (...)". Éier ee seng Rees bucht, soll ee sech iwwert d'Destinatioun informéieren an op enger Online-Kaart préiwen, wéi d'Corona-Situatioun op der Plaz ass.

Fluchverkéier

Bei Volle wëll d'EU-Kommissioun de Fluggesellschaften net virschreiwen, de mëttlere Sëtz an de Passagéierkabinne fräizeloossen. D'Droe vun de Maske soll an de Maschinnen an um Fluchhafen awer obligatoresch sinn.

Hygiènesmesurë fir Hoteller
Wärend den nächste Wochen a Méint muss den Hotel-Secteur mat zousätzlechem Opwand rechnen. Vun der EU gëtt virgeschloen, dass d'Personal bestëmmte Formatioune maachen a Gäscht reegelméisseg iwwert Neiegkeete vun den Autoritéiten informéiere soll. Fir Restauranten a Caféë soll d'Unzuel u Gäscht begrenzt ginn. Sougenannte "Slots" kéinte fir Moolzechten, Fitnesszenteren a Schwämmen a Betruecht gezu ginn. Net ze vergiessen op deene Plazen: Ofstand halen an Hänn reegelméisseg wäschen.

Da musse sech Hoteller drop astellen, Plexiglasscheiwen an der Receptioun opzeriichten, fir d'Personal an d'Gäscht ze schützen. Da recommandéiert d'EU-Kommissioun och Ofstandsmarkéierungen um Buedem.

Lifter solle beschtefalls nëmme vu Persoune benotzt ginn, déi sech en Zëmmer deelen. Déijéineg, déi sech fit genuch spieren, ginn ermontert, d'Trapen ze goen. Och Airbnb an änlech Plattformen dierften d'Gesondheet vun den Touristen net a Gefor bréngen a solle sech un déi selwecht Moossnamen hale wéi d'Hoteller.

Reese mat Kanner oder vulnerabele Leit

Besonnesch oppasse soll een op Kanner, krank an eeler Leit wärend dem Openthalt am Ausland. Vun der Kannerbetreiung an Hoteller roden d'Beamte vun der EU-Kommissioun of. Risikopatiente solle beschtefalls net un Aktivitéiten deelhuelen, bei deene vill Leit participéieren. Et kéint zum Beispill ugebuede ginn, de vulnerabele Leit d'Iessen an d'Zëmmer ze bréngen, fir si op dës Manéier ze schützen.