Ouni Accord ass den éischten Dag vum Sommet vun den europäesche Staats- a Regierungscheffen op en Enn gaangen.

Méiglechen Erfolleg fir de Xavier Bettel um EU-Sommet: der aktueller, nach provisorescher Versioun vun der Ofschlosserklärung no soll Lëtzebuerg 100 Milliounen Euro méi kréie wéi ugangs virgesinn. Dat huet e Lëtzebuerger Diplomat eis confirméiert.

Dës Sue kéinten deemno zum Beispill fir d’Finanzéiere vun Tester a Kuerzaarbechtmesure benotzt ginn. Zu Bréissel gëtt zanter e Freideg iwwert de 750 Milliarde schwéiere Corona-Relance- a Rettungspak verhandelt.

Nodeems d’Staats- a Regierungscheffen e Freideg net op e gréngen Zweig koumen, huet de Rots-President Charles Michel e Samschdeg eng nei Propositioun gemaach, déi ënnert anerem méi Kreditter a manner Subside virgesäit. Den Ament probéiert de fréiere belsche Premier, a bilaterale Gespréicher Zoustëmmung fir säi Léisungsvirschlag ze gewannen.

Et misst elo verhandelt an e Kompromëss fonnt ginn, sot de Lëtzebuerger Premier Xavier Bettel virum Sommet de Samschdeg de Mëtten um RTL-Mikro.

De Xavier Bettel

"Hei muss een ebe verhandele kënnen a wéi gesot, déi 2 extrem Fäll, datt een iwwerhaapt näischt wëll kontrolléiert kréien oder am Fong e Blanko-Check kréien, an déi aner Säit, déi soen, mir wëllen iwwerhaapt keng Sue ginn, musse sech an der Mëtt treffen, andeem mer Solidaritéit all beweisen, andeem mer d'Länner awer och responsabiliséieren, déi Sue kréien, an awer och d'Méiglechkeet hu fir ze kucken, ob dat, wat mer hinnen uvertraut hunn, och richteg gebraucht gëtt. Ech mengen, dass dat de Mëttelwee ass, dee mer, ech hoffen op jidder Fall, haut de Mëtteg wäerte festleeën."

Déi sougenannte "Frugal 4", also 4 Knéckeg, Holland, Éisträich, Schweden an Dänemark, hate sech fir manner Subsiden a méi Kontroll agesat, wat besonnesch staark vun der Kris betraffe Länner wéi Spuenien an Italien net grad begeeschtert huet. Iwwerdeems huet Ungarn blockéiert, well Hëllefen un de Respekt vun der Rechtsstaatlechkeet sollte gebonne sinn.