D'EU-Kommissioun huet en Donneschdeg annoncéiert, datt d'Gespréicher mat der däitscher Firma CureVac fir e méigleche Corona-Impfstoff positiv verlaf sinn.

D'EU-Kommissioun séchert sech weider potentiell Impfdosissen géint de Coronavirus nach ier d'Entwécklung vum Vaccin ofgeschloss ass. Wéi et um Donneschdeg offiziell vu Bréissel heescht, hätt ee sech a Sondéierungsgespréicher den Zougrëff op bis zu 405 Milliounen Vaccinen bei der däitscher Firma CureVac geséchert. D'Entreprise vun Tübingen präziséiert, et géif sech em de Virvertrag vun 225 Milliounen Dosissen handelen, mat enger Optioun fir 180 Milliounen weiderer. CureVac géif den EU-Memberstaaten den Impfstoff an deem Volume zur Verfügung stellen, wann e sech an den Tester als sécher an effikass erausgestallt huet. Ënnerschriwwen ass de Kontrakt nach net.

Den 31. Juli an den 13. August hat d'Kommissioun schonn änlech Gespréicher mat Sanofi-GSK an AstraZeneca ofgeschloss. All Gespréichsronn, déi mat der Pharmaindustrie ofgeschloss gëtt, bréngt eis eisem Zil méi no géint de Virus ze gewannen, sou d'Kommissiounspresidentin Ursula von der Leyen.

D'europäesch Impfstrategie gesäit vir, datt Bréissel am Numm vun alle Memberstaaten Vaccine géint de Coronavirus keeft, déi dann duerno u jiddereen verdeelt ginn. Sou sollt Konkurrenz tëscht de Länner verhënnert ginn. Via d'Instrument vun den Direkthëllefen goufen heifir 2,7 Milliarden Euro deblockéiert.

Erkläerten Zil ass an engem Zäitraum vun 12 bis 18 Méint allen europäesche Bierger a Biergerinnen e sécheren, effikassen an abordabelen Impfstoff zur Verfügung ze stellen. Am Ufank haten nach Däitschland, Frankräich, Italien an Holland an enger sougenannter Vaccinsallianz eege Gespréicher mat der Firma AstraZeneca gefouert. Déi goufen antëscht awer vun der EU-Kommissioun iwwerholl.

D'Vaccine si fir alleguerten d'EU-Staaten geplangt, kéinten awer ënner Ëmstänn un anere Länner mat manner finanzielle Moyene gespent ginn.