Desweidere mécht een Drock op d'Tierkei. Doriwwer goufe sech d'EU-Staats- a Regierungscheffen um Sommet zu Bréissel an der Nuecht op e Freideg eens.

Deemno ginn eng Rei Persounen, déi fir Walfälschung an der Ënnerdréckung vun der Oppositioun am Belarus verantwortlech gemaach ginn, sanktionéiert, de President Lukaschenko ass awer, fir den Ament mol, net op där Lëscht.

De Kreml gesäit an de Sanktioune géint de Belarus en Zeechen vu Schwächt vun den Europäer. All Sanktiounspolitik gëtt vu Moskau allgemeng schlecht ugesinn.

1. Dag vum EU-Sommet / Reportage vum Fanny Kinsch

Wat den tierkeschen Äerdgasprogramm am Mëttelmier a griicheschem an zyprioteschem Waasser ugeet, dreet d'EU der Tierkei weider mat Sanktiounen a fuerdert eng Verbesserung bis Dezember. An der Ofschlosserklärung vum Conseil ginn d'Konfliktparteien am Nagorno-Karabakh, Aserbaidschan an Armenien, opgefuerdert mat de Kämpf opzehalen.

D'Staats-a Regierungscheffen hunn d'Vergëftung vum russeschen Oppositiounspolitiker Alexej Nawalny verurteelt - dorop wäerte si och beim nächste Sommet an 2 Wochen zréckkommen.

Um zweeten Dag geet et zu Bréissel mat wirtschaftlechen Themen weider, méi genee wéi de Bannemaart no der COVID-Kris nees soll gestäerkt  ginn.

De Brexit ass och e Freideg ee vun de Sujeten um Ordre du Jour vum aussergewéinleche Sommet vun de Staats- a Regierungscheffen.

D'Tierkei huet d'Sanktiounsmenace vun der EU zréckgewisen. D'Sprooch vun de Sanktiounen ze benotzen, wier net konstruktiv, heescht et aus dem tierkeschen Ausseministère. D'EU misst verstoen, datt se op dës Aart a Weis näischt erreecht wäert.

Conclusioun vu Lëtzebuerg: E schaarfen diplomateschen Discours

"Et ass e schaarfen diplomateschen Discours" - mat deene Wierder beschreift de Lëtzebuerger Premier Xavier Bettel d'Conclusioune vum EU-Sommet gëschter Owend. D'Tierkei, déi am Fong schonn eng Kéier en Ultimatum wéinst hiren Äerdgas-Aktivitéiten am Mëttelmier gesat krut, gëtt eng weider Kéier verwarnt.

Ma dat léich drun, datt et an de leschten Deeg och Efforte fir eng Deseskalatioun gi wieren, esou de Xavier Bettel, an et misst een drun denken, datt d'Tierkei nach ëmmer e wichtege Partner a Migratiounsfroe wier.

Den Text ass den Zyprioten op alle Fall duergaangen, fir Sanktioune géint Belarus net weider ze blockéieren - géint de President Alexander Lukaschenko selwer ginn awer nach keng Mesure geholl: "Et ass jo net, wéi wa mir elo selwer d'Lëschten och géifen hei maachen, dat sinn d'Ausseministeren oder d'Représentation permanentes, d'Ambassaden, déi sech an de Conseils affaires générales op esou Saachen eenegen. Mee dat heescht, mir hunn elo am Fong d'Ouverture ginn, fir kënne Sanktioune géint Wäissrussland ze huelen, ech mengen dat do ass den éischte Schratt, dee wichteg war, fir an déi Richtung och ze goen, fir dass mer elo och nach kënnen, wann den Här Lukaschenko op d'Sanktiounslëscht kennt, datt net méi hei diskutéiert gëtt, mee datt d'Decisioun dann op deem Niveau ka rapid geholl ginn."

E Freideg de Moie géint 10 Auer sinn d'Staats- a Regierungscheffen dann nees zesumme komm, op dësem Dag geet et ënnert anerem ëm de Bannemaart no der sanitärer Kris. Fir de Xavier Bettel ass et wichteg, datt et net méi zu Situatioune komme kann, an deene Medikamenter bannent der EU op Grenzen hänke bleiwen.

Da misst een och nach nobessere beim Volet Digitalisatioun a 5G: "Dir wësst dass mer och zu Lëtzebuerg déi Diskussioun och hunn, fir mech feelen hei d'Aspects sanitairen och an de Conclusiounen, dat heescht, dass guer net gekuckt gëtt, wéi et mat der Gesondheet vun de Leit geet oder Ëmweltfroen. Fir mech mussen déi och dra sinn, mir brauchen héich Standarden, d'Leit mussen acceptéiere kënnen, firwat de 5G gebraucht gëtt, mee dass et awer och keng Gefor fir si ass an dofir ass et wichteg dass dat och an de Conclusioune kënnt, dat steet nach net dran, dat wäert da méi klenge Match fir de Moie sinn."

Esou wäit de Premier Xavier Bettel e Freideg de Moie virum 2. Dag vun der Verhandlungen um EU-Sommet hei zu Bréissel.