Op 3 Punkten sinn d'Divergenzen tëscht Groussbritannien an der EU einfach nach ze verschidden, ma d'Perspektiv wier weiderhin en Deal ze fannen.

EU-Sommet zu Bréissel / De Reportage vum Claudia Kollwelter

"Mir maachen alles wat mer kënnen, fir en Deal mat Groussbritannien ze areechen, mä net zu egal wéi engem Präis" dat hunn den EU-Chefnegociateur Michel Barnier, an den EU-Rotspresident Charles Michel en Donneschdeg den Owend um Sommet zu Bréissel betount. D'EU-Staats- a Regierungscheffen hunn nieft dem Klimawandel an der Corona-Pandemie op en Neits iwwert d'Brexit-Negociatiounen diskutéiert. De Ball géif elo bei de Britte leien. Dat ass op d'mannst dat, wat den EU-Rotspresident Charles Michel en Donneschdeg ënnerstrach huet. Et géif een u Groussbritannien appelléieren, déi néideg Schrëtt anzeleeden.

De Chef-Negociateur fir d'Britten David Frost war iwwerrascht iwwert déi Ausso an huet getwittert, datt de Premier Boris Johnson um Freideg annoncéiere wäert, ob Groussbritannien bereet ass, weider ze negociéieren.

En Handelsaccord mat der Europäescher Unioun ass onwarscheinlech, seet de brittesche Premier Boris Johnson e Freideg. Hie géif säi Land op en haarde Broch mat der EU ouni Accord, also en haarde Brexit op den 1. Januar astëmmen. Bréissel hätt manifestement keen Interessi fir mat Groussbritannien en Handelsaccord auszeschaffe wéi mat Kanada. Komplett ofgebrach huet den Johnson d'Gespréicher mat der EU allerdéngs net.

De Lëtzebuerger Premier Xavier Bettel sträicht e Freideg nom Sommet zu Bréissel ervir, datt nach ëmmer e Wëllen do wier, fir en Accord ze fannen:

"Et ass de Beweis, datt wa mer zesummen halen, een och gesäit, datt een déi Faille net fënnt, fir eis auserneen ze dreiwen. Soulaang geschwat gëtt, ass Hoffnung do. Mee et war jo ugekënnegt ginn, wann virum 15. Oktober näischt ass soll ofgebrach ginn, mee mir gesi jo datt awer nach e Wëlle vu London do ass, fir zesummen eng Léisung ze fannen. Dat wier am Interêt vun eis alleguerten."

Soulaang diskutéiert géif ginn, sollt och keen No-Deal deposéiert ginn, huet de Premier Xavier Bettel nach ënnerstrach.

Divergenzen tëscht Groussbritannien an EU-Länner

Den EU-Chef-Negociateur Michel Barnier huet betount, datt et op enger Partie Punkten nach Divergenze ginn, op 3 Punkte wieren d'Point-de-vuen à ce stade souguer einfach ze verschidden, mä d'Perspektiv wier déi vun engem Deal. A fir deen Deal ze erreechen, misst ee weider verhandelen.

Et wier een op alle Fall weider disponibel, bis de lescht méiglechen Dag fir ze negociéieren. Et misst ee bis zu Lescht dem Ganzen eng Chance ginn, en Erfolleg ze ginn.

De Charles Michel huet nach betount, datt déi 27 Staats- a Regierungscheffe vereent a weider determinéiert wieren a puncto Brexit.

Weider Sujeten um EU-Sommet

Anere Sujet war dann de Klimawandel a méi konkret d'Klimaziler bis 2030. D'EU-Kommissioun hat proposéiert, d'Zäregasemissioune bis 2030 op e Minus vu 55% par Rapport zu 1990 ze kréien. Ënnert anerem Polen ass awer do nach net mat am Boot, et wier en Zil, wat net realisabel fir hiert Land wier, heescht et. Am Dezember wëll sech de Conseil eréischt op en neit Zil eenegen, heescht et an de Konklusioune vum Sommet. Dëst soll da virum Enn vum Joer am Kader vum Paräisser Klimaofkommes de Vereenten Natioune virgeluecht ginn.

D'Presidentin vun der EU-Kommissioun Ursula von der Leyen huet de Sommet en Donneschdeg iwwregens fréizäiteg verlooss. Well se mat enger Persoun a Kontakt war, déi positiv op de Coronavirus getest gouf, ass si an Auto-Isolatioun.

D'Corona-Pandemie, déi eigentlech um Freideg eréischt um Ordre du jour sollt stoen, war dann och schonn en Donneschdeg Thema um Sommet zu Bréissel.

D'EU-Staats- a Regierungscheffe si sech iwwer eng intensiv Zesummenaarbecht bei der Bekämpfung vun der Pandemie eens ginn. Et hätt ee sech op eng besser Koordinatioun bei de Quarantän-Virschrëfte gëeenegt, sou wéi en grenziwwerschreidende Contact Tracing, Teststrategien, den Opbau vun Impfkapazitéiten a Reesaschränkungen.

Ma och de Respekt vun der Rechtsstaatlechkeet an d'Relatioune mat der Tierkei wäerten nach fir déi eng oder aner Diskussioune suergen.