D'EU-Landwirtschaftsminister goufe sech an der Nuecht op e Mëttwoch op hirem Conseil hei zu Lëtzebuerg eens iwwert d'Agrarreform.

Dat no zéie Verhandlungen. Et geet em honnerte Milliarden Euro, de gréisste Posten am EU-Budget.

D'EU-Staate missen eng Partie Ëmwelt-Ziler erfëllen, fir finanziell Hëllef fir hir Landwirtschaft ze kréien. De Kompromëss gëtt de Länner elo méi Fräiheeten, wéi si dës Ziler wëllen areechen. D'Bauere selwer kréien och méi Subventiounen, wa si verschidden ökologesch Ziler erfëllen. Fir déi nächst zwee Joer gëllt eng Iwwergangsphas. Déi nei Reegele géifen also eréischt vun 2023 u gëllen.

Parallel gëtt d’Reform iwwregens dës Woch och am EU-Parlament debattéiert. Eréischt dono kënnen d’Verhandlungen iwwert e finalen Text ufänken.

Schaarf Kritik un der EU-Agrarreform kënnt vun der Ëmweltorganisatioun Greenpeace. Et wär „Greenwashing“ vun der iwwelster Zort. Et géing ee maachen, wéi wann d'Reform ëmweltfrëndlech wär, mä dat wär se net. Besonnesch grouss Betriber kéinten dovu profitéieren.