E Mëttwoch gouf de Kontrakt ënnerschriwwen. Dat fir 200 Milliounen Dose Vaccin, plus d'Optioun fir weider 100 Milliounen.

Den Deal tëscht der europäescher Kommissioun an de Pharmaentreprisen Biontech a Pfizer ass an dréchenen Dicher. Wéi béid Entreprisen e Mëttwoch matgedeelt hunn, gouf de Kontrakt iwwert d'Liwwerung vu bis zu 300 Milliounen Dose vum Impfstoff tëschent hinnen an der EU ënnerschriwwen.

D'Ausliwwerung soll viraussiichtlech Enn 2020 ufänken, wann den Impfstoff dann déi néideg Autorisatioun kritt.

Pro Impfung sinn zwou Dosen, also zwou Sprëtzen néideg. E Méindeg hate Biontech a Pfizer jo éischt Resultater vum Impfstoff presentéiert a vun iwwer 90% Wierksamkeet geschwat.

D'Pharmanentreprise Biontech hat en Dënschdeg och ugekënnegt, de Präis vum Impfstoff géint de Coronavirus ënnert den "typesche Marchéspräisser" usetzen ze wëllen. Donieft wäert een de Präis jee no Land a Regioun differenzéieren, sou de Biontech-Manager Ryan Richardson géintiwwer der "Financial Times". Et wéilt een e weltwäiten Zougang zum Impfstoff sécherstellen.