D'Europäesch Agence fir Medikamenter huet e Méindeg recommandéiert, fir de Vaccin vu Biontech a Pfizer op de Marché ze bréngen.

Et géing eng robust wëssenschaftlech Ënnerlag ginn fir dëst ze maachen. D'Beneficer iwwerweie kloer d'Risiken, esou d'Agence. Se huet awer betount, datt se zesumme mam Pharmakonzern a mat den nationalen Autoritéiten d'Impfcampagne wäert ënnert d'Lupp huelen. Et war den Appell un d'Santésprofessioneller, mee och un d'Leit, fir eventuell Nieweneffekter matzedeelen. Fir sécher ze sinn soll iwweregens och all Persoun, déi geimpft gëtt, 15 Minutten an Observatioun bleiwen.

De Ball läit elo bei der EU-Kommissioun fir de Memberstaaten d’Richtlinnen ze ginn, fir de Gebrauch vum Vaccin, mee dat gëtt als Formsaach ugesinn. Deen Accord gëllt als sécher.

Direkt no der Annonce huet d'EU-Kommissiounspresidentin Ursula von der Leyen op Twitter geschriwwen, dass nach am Laf vum Méindeg eng Decisioun fale wäert: "Mir musse séier handelen."

Wann alles wéi geplangt ofleeft, dann kéinten déi éischt Mënschen an der EU den 27. Dezember geimpft ginn.

RTL-Informatiounen no ginn éischt Dose vum Biontech-Pfizer-Vaccin de 26. Dezember op Lëtzebuerg geliwwert. Zwee Deeg drop soll mam Impfen ugefaange ginn, wéi de Lëtzebuerger Premier Xavier Bettel e Méindeg confirméiert huet.

D'EU hat sech vu Biontech-Pfizer bis zu 300 Milliounen Impfdose geséchert. Nach dëst Joer wëlle béid Pharmakonzerner bis zu 50 Milliounen Dosisse produzéieren, nächst Joer bis zu 1,3 Milliarden.

Ënnert anerem an den USA gëtt jo scho geimpft, d'EU hat sech awer géint eng Noutzouloossung decidéiert. Domadder wär et zwar méi séier gaangen, mä dann hätten zum Beispill déi jeeweileg Länner missen haften. Bei enger allgemenger Autorisatioun läit d'Haftung grondsätzlech beim Produzent.

D'Europäesch Agence fir Medikamenter huet iwwregens ugekënnegt, datt se hiren Avis fir de Vaccin vu Moderna kéint de 6. Januar ofgeschloss hunn.