De Mainzer Produzent Biontech wëllt méi Impfstoff wéi geplangt un d'Europäesch Unioun liwweren.

D'Entreprise befënnt sech "an Diskussiounen, ob a wéi mir weider Impfstoffdosissen aus Europa fir Europa an dësem Joer kënnen zur Verfügung stellen", sou de Chef vun der Entreprise Ugur Sahin der Noriichtenagence AFP géintiwwer.

"Wéinst den aktuell héijen Infektiounszuelen ass eng séier Versuergung mam Impfstoff besonnesch wichteg", sou nach de Sahin. "Mir schaffe mat der EU zesummen, fir eis Produktiounskapazitéite weider auszebauen an zousätzlech Dosisse vum Vaccin zur Verfügung stellen ze kënnen."

De Sahin huet och drop verwisen, datt dës Woch mat der EU-Kommissioun decidéiert gouf, weider 100 Milliounen Impfdosissen ze liwweren. Dës Optioun war souwisou schonn am Kontrakt festgehale ginn.

Biontech-Chef verwonnert iwwer EU-Strategie

De Chef vun der Mainzer Entreprise Biontech ass verwonnert doriwwer, dass een an der Europäescher Unioun offensichtlech géing mengen, et kréich ee genuch Dosen, et wär alles net esou schlëmm, an et hätt een alles ënner Kontroll.

De Chef vu Biontech fënnt de Plang vun der EU, sech e Kuerf aus Vaccine vu verschiddenen Impfstoffer zesummenzestellen, vum Prinzip hier gutt. Dunn hätt sech awer erausgestallt, dass vill Produzenten iwwerhaapt net mat Zäit liwwere kënnen. Du wär et awer ze spéit gewiescht, fir enzwousch anescht nach genuch nozebestellen, esou de Sahin.

Dem ''Spiegel'' no hätten d'USA sech schonn am Juli 600 Milliounen Dose vu Biontech geséchert. Duebel esou vill wéi d'Europäesch Unioun, déi eréischt am November bestallt huet.

Biontech wëllt iwwerdeems dann och méi Impfstoff produzéieren an huet dofir och scho mat fënnef weidere Produzenten an Europa Verträg ënnerschriwwen. Si solle bei der Produktioun vum Vaccin hëllefen. Bis Enn Januar soll et Kloerheet ginn iwwer d'Produktiouns-Quantitéiten. Dat sot d'Chef-Medezinnerin vu Biontech, d'Özlem Türeci an engem Interview mam Spiegel.