D'EU weist sech besuergt iwwert d'Situatioun vun honnerte Flüchtlingen am Nordwesten vu Bosnien, deenen hiert Lager an engem Groussbrand zerstéiert gouf.

D'Situatioun wier komplett inakzeptabel, esou den EU-Representant fir Bosnien Johann Sattler, no enger Entrevue mam bosnesche Sécherheetsminister. D'Liewen an d'Grondrechter vun honnerte Persoune wiere seriö a Gefor.

D'EU-Kommissioun an déi international Organisatioun fir Migratioun fuerderen, Bosnien misst en neie Flüchtlingscamp opmaachen, ma déi lokal Autoritéite si géint de Site, dee proposéiert gouf. D'lescht Woch sollten d'Flüchtlingen an eng al Kasär am Süde vum Land bruecht ginn. Op der Plaz konnte si awer net erausklammen, well d'Awunner vun do géint hir Arrivée protestéiert hunn.

D'Europäesch Unioun huet elo eng finanziell Hëllef fir honnerte Flüchtlingen an Aussiicht gestallt. De Josep Borrell huet e Sonndeg annoncéiert, dass d'EU bereet wier, zousätzlech 3,5 Milliounen Euro fir humanitär Hëllef a Bosnien ze bezuelen. Gläichzäiteg huet hien awer gefuerdert, dass en neit Lager misst gebaut ginn. "E wanterfesten Ënnerdaach wier eng Viraussetzung fir mënschewierdeg Liewensbedingungen, déi zu jidderzäit misste garantéiert ginn", huet de Borrell nach betount.