Während d’EU wéinst Produktiounsproblemer nëmmen een Drëttel vun de geplangten Dosissen kréie soll, kritt d’Liwwerung mat Groussbritannien keng Retarden.

Dobäi kënnt, dass déi däitsch Impfkommissioun réit, de Vaccin vun AstraZeneca nëmme bei Persounen tëscht 18 a 65 Joer ze sprëtzen.

Dës Recommandatioun gouf vun der stänneger Impfkommissioun vum Robert Koch-Institut domadder begrënnt, dass et an der Impfstoffstudie "aktuell net genuch Donnéeë" ginn. Vun de ronn 11.700 Persounen, déi un der Etüd deelgeholl hunn, waren nämlech nëmmen e puer Prozent iwwer 65 Joer al.

EU vs AstraZeneca / Reportage Monica Camposeo

D’EU-Zouloossung vum AstraZeneca-Vaccin gëtt sech um Freideg erwaart. Op Nofro hin huet d’Santé matgedeelt, dass een op déi genee Krittäre vun der Zouloossung wéilt waarden, ier een entscheet, wéi dëse Vaccin soll agesat ginn. Zousätzlech suergt de Retard bei de Liwwerungen, dee jo scho vum brittesch-schweedesche Pharmakonzern ugekënnegt gouf, fir Kritik. Den EU-Kommissär Nicolas Schmit dozou:

"AstraZeneca produzéiert an der europäescher Unioun an natierlech och an England. Mir wësse jo alleguer, dass et eng englesch-schwedesch Firma ass. An et besteet e bëssen e Verdacht, dass do Dosen ofgezweigt solle ginn. Fir op aner Plazen utiliséiert ze ginn. An do ass de Konflikt, dass d'europäesch Unioun eben insistéiert, fir dass de Vertrag respektéiert gëtt."

Dowéinst verlaangt d’EU-Kommissioun och d’Detailer vum Vertrag tëscht dem Pharmakonzern an der brittescher Regierung. Den Toun vun der EU hätt sech scho verschäerft, esou d’Deputéiert Tilly Metz:

"D'Kommissioun huet och d'Méiglechkeet elo en Audit ze maachen vun de Sites de Productions. Hei ass dat elo an der Belsch an an Holland, mee si produzéiere jo och a Groussbritannien. Mee fir emol hei Asiicht ze hunn, wou d'Produktiounsproblemer sinn. A wat d'Kommissioun elo och gefuerdert huet, ass en Transparenzregister vun den Exporter vun de Vaccinen."

Wann also gesot gëtt, dass net genuch Dosisse fir d’EU do sinn, da soll analyséiert ginn a wéi eng aner Länner Vaccin exportéiert gouf. Ausserdeem fuerdert déi gréng Deputéiert, dass déi 6 Verträg tëscht der EU an de Pharmakonzerner integral verëffentlecht ginn.

Wat gouf ausgemaach?

80 Milliounen Dosisse sollt AstraZeneca laut EU-Vertrag bis Enn Mäerz liwweren, elo kéint een der nëmmen 31 Millioune garantéieren, sou d'Ausso dës Woch vun der Entreprise.

Fir Lëtzebuerg heescht dat, datt een net bis Enn Mäerz 112.000 Dosisse kritt, ma nëmmen 43.400. Knapp 35.000 Leit kënnen esou manner geimpft ginn.

EU wëll Export vum Impfstoff am Noutfall blockéieren

D'EU wëllt de Memberstaaten d'Méiglechkeet ginn, Exporter vu Corona-Impfstoffer am Noutfall ze blockéieren.

D'EU-Kommissioun wäert dozou viraussiichtlech e Freideg ee Virschlag virstellen, sou EU-Vertrieder en Donneschdeg. Haaptzil ass deemno, Informatiounen iwwer Exporter ze sammelen a sécherzestellen, datt dës net zu Laaschte vun an der EU bestallte Liwwerunge ginn.

Haaptgrond ass de Sträit mat der Pharmaentreprise AstraZeneca, där hiren Impfstoff e Freideg an der EU zougelooss kéint ginn. Déi schwedesch-brittesch Entreprise hat déi lescht Woch massiv Liwwerschwieregkeete wéinst Produktiounsproblemer an engem Wierk an der Belsch zouginn. Zu Bréissel war een doropshin net frou, well Liwwerunge vun der Firma un Drëttstaate wéi ënnert anerem Groussbritannien net gekierzt ginn.

"Et ass keen Exportverbuet", sou een EU-Vertrieder zum geplangten "Transparenz- Lizenzéierungsmechanismus". "Et geet ee grondsätzlech dovunner aus, datt d'Exporter wéi geplangt stattfannen." A "seelene Fäll" kéint et awer dozou kommen, datt den Accord fir den Export verbuede gëtt. Dofir soll et an der EU-Rechtsgrondlag Krittäre ginn, en Donneschdeg goufen do awer nach keng genee Informatioune genannt.

An der Praxis mussen d'Produzenten de fir si zoustännegen nationalen Autoritéite matdeelen, "wat, wéini, u wien an a wéi engem Ëmfang" se exportéiere wëllen, sou en EU-Vertrieder. Déi national Autoritéite kënnen dann hiren Accord fir den Export ginn oder eben net. D'Decisioun doriwwer soll bannent 24 Stonne falen.

D'EU-Vertrieder hu vun enger "Noutfallmoossnam" geschwat, déi zäitlech begrenzt bis um Enn vum éischte Quartal gëlle soll. Et wär awer net ausgeschloss, datt se verlängert kéint ginn. Impfstoff-Exporter bannent der EU wäre genausou wéineg betraff wéi humanitär Hëllefsliwwerungen un Ziler baussent der EU.