D'EU-Kommissioun sollt e Mëttwoch de Mëtteg hir Krittäre presentéieren, wéi eng Projeten an Zukunft virun allem am Energiesecteur als nohalteg gëllen.

D'EU-Kommissioun huet d'Bewäertung vun der Nohaltegkeet vun Äerdgas an Atomenergie an domat d'Decisioun iwwer Investitiounen an entspriechend Projete verréckelt. Béid ëmstridden Energiequelle goufen e Mëttwoch bei der Definitioun vu gréngen Investitiounen ausgeklammert, genee wéi Investitiounen am Beräich vun der Landwirtschaft.

Am Fall vun der Atomenergie huet d'Kommissioun op e bis ewell net finaliséierte Bericht vun Experte verwisen. De Rapport wier wuel fäerdeg, dee misst awer nach vun 2 weidere Experte-Gremië gepréift ginn. Soubal d'Viraussetzungen erfëllt wieren, géif een och déi néideg Decisiounen huelen.

Beim Äerdgas gouf eng technesch Bewäertung an en ëffentleche Sondage duerchgefouert an dobäi hätt sech e breede Spektrum un Usiichte bei den Interessensgruppe gewisen. Am Laf vum Joer soll deemno nach gekuckt ginn, wat fir eng Auswierkungen Äerdgas op d'Ëmwelt huet.

Iwwert d'Roll vu Gas- an Atomenergie gëtt an Europa zanter Joren hefteg gestridden.

Fir datt d'EU hir Energieziler fir 2030 an d'Ziler vum europäesche Green Deal erfëlle kann, sollen Investissementer an Zukunft an nohalteg Projeten an Aktivitéite fléissen. Fir dat ze erreechen, bräicht een der Kommissioun no eng gemeinsam a kloer Definitioun, wat nohalteg ass a wat net. Mee genee bei där Fro schéngt et awer schwéier ze sinn, e Konsens tëscht den EU-Memberstaaten ze fannen.

Zanter 3 Joer schafft d'EU un dëse Krittären, déi ëmmer erëm fir kontrovers Diskussioune gesuergt hunn. Op där enger Säit hunn eng Partie Memberstaate kritiséiert, datt Äerdgas oder och Atomkraaft net als gréng oder als Iwwergangsinvestitioun consideréiert géif ginn. Op där anerer Säit hunn Ëmweltorganisatioune sech dofir staarkt gemaach, datt d'EU-Taxonomie net genotzt gëtt, fir sougenannten "Greenwashing" an, datt net versicht gëtt all Aktivitéit per Force iergendwéi an den Text anzebauen. Et kéint net sinn, datt Secteuren als nohalteg klasséiert ginn, déi fir héich Emissioune suergen. Nach ass net gewosst, ob Äerdgas an Atomkraaft am Text, deen e Mëttwoch presentéiert gëtt, wäert dra stoen oder eréischt zu engem spéideren Zäitpunkt bäigefüügt soll ginn.

Wëll den Entworf vun der Taxonomie schonn esou dacks geännert gouf, schéngt d'Euphorie vu villen Experten ofgeholl ze hunn. An engem Bréif un d'EU-Kommissioun kritiséiere Memberen aus dem Grupp vun Experte fir Taxonomie, datt den Afloss vu Lobbye vu verschiddenen Industrien hir Recommandatiounen an de Schiet stellen.