Doriwwer hunn e Freideg d'europäesch Staats-a Regierungscheffen um Sozial-Sommet zu Porto diskutéiert.

D'portugisesch Presidence huet sech zum Zil gesat, datt d'Memberlänner an d'Institutioune sech verstäerkt sozial engagéieren.

An enger gemeinsamer Deklaratioun hunn sech d'Memberlänner e Freideg den Owend drop gëeenegt, fir bis 2030 déi sozial Lag an der EU däitlech ze verbesseren. Bis zum Enn vun dësem Joerzéngt sollen op d'mannst 78 Prozent vun den Europäer eng Aarbechtsplaz hunn, 60 Prozent sollen op d'mannst 1 Mol d'Joer an d'Formation continue kënne goen an d'Zuel vun de Leit, déi riskéieren an d'Aarmut ze falen, soll ëm op d'mannst 15 Milliounen Europäer reduzéiert ginn.
Den portugisesche Premier Antonio Costa huet vun engem historeschen Ament geschwat. D'Kommissiounspresidentin von der Leyen huet annoncéiert, dass 750 Milliarden Euro an d'Relance géingen investéiert ginn. De Programm wär méi grouss wéi den „Marshall-Plang", ma misst elo och séier ëmgesat ginn.

Lëtzebuerg wier gären nach méi wäit gaangen, ma wa 27 Länner ronderëm en Dësch sëtzen, da musse Kompromësser gemaach ginn, sou de Premier Xavier Bettel, deen zu Porto dobäi ass:

Extrait Xavier Bettel 1

Mir wiere méi ambitiéis gäre gewiescht, mä dofir däerf een net Saache blockéieren. Verschidde Länner sinn ebe bei soziale Rechter méi zéi. Mä all klenge Schrëtt ass wichteg, bei der Ëmwelt hu mer och sou ugefaangen. Mä et ass nach e wäite Wee.

Länner aus dem Norde wiere sech zum Beispill géint nei EU-Reegelen a puncto Mindestloun. Den zoustännege Kommissär Nicolas Schmit plädéiert fir gemeinsam Standarden. Et wier ee sech awer bewosst, datt en eenheetlechen europawäite Mindestloun net realistesch ass, sou de Lëtzebuerger Politiker um Deutschlandfunk.

En anere Sujet, wou et Widderstand vun enger Partie Länner gëtt ass d'Gläichheet tëscht de Geschlechter.
De Staatsminister Xavier Bettel huet fir déi Retizenze wéineg Versteesdemech:

Extrait Xavier Bettel 2

"Ech géing et traureg fannen, wann dat net drasteet, mä wann et déi eenzeg Méiglechkeet war, fir en Deal ze fannen, dann ass et sou. Fir eis ass et traureg, datt 2021 verschidde Länner net verstinn, datt wann een an enger Gesellschaft lieft, datt dat eng Composante zu 100% ass, mat alle Verschiddenheeten. Dat ass d'Stäerkt vun enger Gesellschaft. Déi Regierungen, déi mengen, datt jidderee muss an e Moule passen, Nationalitéit, Relioun, Sexe. eEt ass traureg, mä et ass esou. Mä wann een zu 27 un engem Dësch sëtzt, do huet een heiansdo e méi konservative Monni do sëtzen, deen manner averstanen ass, fir eng méi modern Politik ze maachen.

E Samschdeg um informelle Conseil zu Porto geet et weiderhin ëm d'Sozialpolitik. Ënner anerem gëtt do iwwer sozial Froen debattéiert, déi a Relatioun mat der Covid-Pandemie stinn.