Eng Delegatioun vun den EU-Staaten an d'Europaparlament hu sech en Dënschdegowend op d'Reegele fir de sougenannte Country-by-Country-Reporting gëeenegt.

Grouss Entreprisë sollen et an Zukunft méi schwéier hunn, fir hir Beneficer an der EU hin an hier ze drécken an esou Steieren ze vermeiden. D’EU-Parlament an d’Memberstaaten hu sech op nei Steier-Transparenzreegele gëeenegt.

Steiergerechtegkeet/Reportage Carine Lemmer

Zanter 2016 gouf doriwwer verhandelt. Lëtzebuerg huet laang éischter gebremst, an der Lescht awer net méi. D’Reegelung, déi elo fonnt gouf, gëtt vu ville Säiten en „Duerchbroch“ genannt.

Och fir déi gréng Europadeputéiert Tilly Metz ass et e grousse Schratt an déi richteg Richtung.

"Jo, ech denke schonn, dat ass en Duerchbroch. Et ass e wichtege Schrëtt an déi richteg Richtung am Kampf fir méi Steiergerechtegkeet duerch méi Transparenz. Et kann net sinn, datt Mëttel- a Klengbetriber hir Steiere bezuelen a grouss Entreprisen onmoossege Profit maachen, ouni Steieren ze bezuelen."

An Zukunft gi richteg grouss Entreprisë mat engem Joresëmsaz vun iwwer 750 Milliounen Euro gezwongen, hir Recetten, Beneficer, Mataarbechterzuelen an d’Steieren, déi se bezuelen – opgeschlësselt jee no EU-Land – unzeginn.

"Duerch dee public Country-by-Country-Reporting musse si ëffentlech maachen, wou si Profit maachen, wou se Steiere bezuelen. An dat fir all Land, wou se present sinn. Domadder wäert et méi einfach sinn ze gesinn, wou Profitter gemaach ginn a wou Steiere bezuelt ginn."

Lëtzebuerg huet sech wéi gesot laang Jore géint déi Transparenz gewiert, an der Lescht awer net méi gebremst. Am Februar dëst Joer huet de Wirtschaftsminister Franz Fayot no engem Kompetivitéits-Conseil erkläert, datt seng Regierung fir Steiertransparenz a géint Steiervermeidung wär. Och d’Tilly Metz mengt, datt déi zukünfteg Reegelung Lëtzebuerg ze gutt kënnt.

"Lëtzebuerg war am leschte Conseil jo en faveur, fir den Dossier ze deblockéieren. Och fir Lëtzebuerg, mir wëllen net méi dee Stempel op der Stier hu vu „Steierparadäis“ oder „tax haven“."

Déi gréng Europadeputéiert erënnert drun, datt déi aggressiv Steierpolitik d’EU-Länner all Joer 50 Milliarden Euro kascht.