Den ungareschen Ausseminister dogéint huet sech géint d'Uschëllegunge gewiert. Fir hien ass d'Kritik u senger Regierung eng "weltwäit Fake-News-Campagne".

An Ungarn gouf déi lescht Woch e vill kritiséiert Gesetz gestëmmt, wat d'Informatiounsrecht zum Thema Homo- an Transsexualitéit fir Jonker bis 18 Joer verbitt. An enger gemeinsamer Deklaratioun hunn d'Beneluxstaaten dat neit ungarescht Gesetz op dat schäerfst verurteelt. Sëllegen EU-Ausseministeren aus anere Länner hu sech ugeschloss. En Dënschdeg den Owend am RTL-Journal huet den LSAP-Ausseminister Jean Asselborn Stellung bezunn:

"Ech mengen, do si ganz vill Leit, déi si sech eens, dass dat dote ganz ganz schlecht ass, oneuropäesch ass. Mir liewen an der europäescher Gesellschaft mat Villfalt, an och mat Toleranz. An déi Reeboufaarwen, dat ass jo d'Symbol vun där Toleranz. Ech fannen, dass et oneuropäesch ass, dass mer matzen an Europa op eemol lo eng Debatt kréien, wou mer Leit stigmatiséieren, déi an hirer sexueller Orientatioun villäicht anescht sinn, wéi déi meescht Leit. Dat ass awer hier intim Konviktioun. Do huet de Staat näischt dran ze sichen. An ech mengen, dass et total falsch ass, dass mer elo op eemol géifen higoen a soen, bis 18 Joer däerf een net wëssen, wat a sengem Ëmfeld geschitt, wéi d'Leit zesummeliewen, wéi hir sexuell Orientatioune sinn."

Beim Match Däitschland Ungarn e Mëttwoch sollt en Zeeche géint Diskriminéierung gesat ginn, an d'Allianz Arena a Reeboufaarwe beliicht ginn. Dëst huet d'Uefa awer verbueden. Den ungareschen Ausseminister seet, et sollen hei net Politik a Sport vermëscht ginn. De lëtzebuergeschen Ausseminister fënnt awer, mat dem Beliichte vum Stadion hätt een kënnen en Zeeche sëtzen:

 D'Uefa ass héchstwarscheinlech e Veräi vun ale wäisse Männer. Dat sinn déi nämmlecht, déi fir de Brexit an déi fir den Här Trump gestëmmt hunn. Déi Mentalitéit, dat ass Schued. Déi gesi just de Reebou-Fändel a se gesinn net dat Ganzt. Wann dee Stadion beliicht wier zu München, dat wier e Symbol wou effektiv ee jo net dem Orban Recht gëtt doranner. Mee mir kënnen dach déi Leit déi eng aner Orientéierung hunn net einfach stigmatiséieren. Mir mussen higoen an déi Toleranz an déi Villfalt an der Europäescher Unioun weisen.

Peter Szijjarto: "D'Kritik un der ungarescher Politik ass eng global Fake News-Campagne"

RTL

Dat seet den ungareschen Ausseminister Peter Szijjarto um Bord vum Ausseminister-Treffen am RTL-Interview.

Kritik un Ungarn / Reportage Tim Morizet

D'ungarescht Parlament hat d'lescht Woch mat grousser Majoritéit e Gesetz gestëmmt, duerch dat et verbuede gëtt mat Mannerjäregen iwwer Homosexualitéit oder Transgeschlechtlechkeet ze schwätzen. De Minister verdeedegt d'Gesetz - hei géing keen diskriminéiert ginn. Jiddereen iwwer 18 dierft seng Sexualitéit an Ungarn ausliewen – fir déi Mannerjäreg wieren d'Eltere fir déi sexuell Educatioun zoustänneg.

Beim Ausseminister-Treffen um Kierchbierg gëtt et staark Kritik um Gesetz - et wier Europa net wierdeg, sou de Lëtzebuerger Chefdiplomat Jean Asselborn. Et géing een net méi am Mëttelalter liewen.

D'Benelux-Staaten hunn eng gemeinsam Deklaratioun geschriwwen, an där d'EU-Kommissioun opgefuerdert gëtt, ze handelen, déi ënnert anerem vun Däitschland a Frankräich ënnerstëtzt gëtt.

De franséischen Europaminister Clément Beaune huet iwwerdeems d'Decisioun vun der Uefa bedauert, déi et net erlaabt datt de Futtball-Stadion zu München beim Match Däitschland-Ungarn an de Reeboufaarwe beliicht gëtt.

De Buergermeeschter vu München huet mëttlerweil annoncéiert, datt eng Rei aner Gebaier uechter d'Stad wäerten an de Reeboufaarwe beliicht ginn - Mir loossen eis op kee Fall dovunner ofhalen, e kloert Signal un Ungarn an un d'Welt ze schécken, sou den Dieter Reiter virun der Press: Wir reden jetzt viel über Politik, was wir aber als Signal senden wollen, ist ein Signal der Menschlichkeit, ein Signal der Toleranz, ein Signal der Weltoffenheit. Das hat nichts mit Parteipolitik, wie wir hier in München auch feststellen durften zu tun.