"Et ass traureg, dass ee juristesch Schrëtt muss ënnerhuelen, fir un eis Wäerter z'erënneren". Dat sot de Premier Xavier Bettel um RTL-Mikro.

EU-Sommet - Reportage Tim Morizet

Am Virfeld vun deem Sommet hunn am Ganze 17 Staats- a Regierungscheffen ee vu Lëtzebuerg initiéierte Bréif ënnerschriwwen, deen d'EU-Institutiounen opfuerdert, d'Rechter vun der LGBT-Communautéit ze schützen - an d'Thema domat héich op den Agenda vum Sommet gesat.

Hannergrond ass en ungarescht Gesetz, dat d'Informatiounen iwwer Homosexualitéit an Transgeschlechtlechkeet staark aschränke soll, dat awer net explizitt am Bréif ernimmt gëtt.

„Et ass nach kee schwul ginn, well en Télé gekuckt huet“, sot de Xavier Bettel zu deem Gesetz.

Et géing och vill soen, datt net all d'EU-Memberstaate sech dem Bréif ugeschloss hätten, seet de Xavier Bettel, ma ëmmerhin d'Majoritéit.

Orban: De Gesetzes-Text gouf net richteg gelies

Den ungaresche Regierungschef Viktor Orban verdeedegt dat Gesetz allerdéngs. Hie sot virum Sommet zu Bréissel, d'Gesetz géif sech net géint Homosexueller riichten, mä den Elteren dat exklusiivt Recht op d'Sexualerzéiung vun hire Kanner ginn. Den Orban reprochéiert senge Kritiker, den Gesetztext net richteg gelies ze hunn.

De Generalsekretär vun de Vereenten Natiounen ass Gaascht bei dësem Sommet. Hien huet d'Diskriminéierung vu Schwulen a Lesben als ''komplett inakzeptabel'' beschriwwen

Corona, Russland, Tierkei an neit Gesetz an Ungarn wuel um Ordre du jour

Ee vun den Haaptpunkten um Ordre du jour ass natierlech dat weidert Virgoen an der Corona-Pandemie an an deem Zesummenhang méiglech Deconfinementer beim europawäite Reesen.

E weidere Punkt, deen um éischten Owend um Programm steet, dréint sech ëm déi schwiereg Relatioun mat Russland. Däitschland a Frankräich hu jo proposéiert, dass et zu Sommeten tëscht der EU a Moskau soll kommen.

D'EU misst den direkte Kontakt mat Russland a mam russesche President Vladimir Putin sichen a gläichzäiteg gemeinsam op Provokatioune reagéieren - dat sot déi däitsch Bundeskanzlerin. Et geet net duer, datt den amerikanesche President mam russesche President schwätzt, sou d'Angela Merkel bei der Regierungsdeklaratioun am Bundestag, d'EU misst och nei Formater fir Gespréicher schafen.

D'Evenementer aus de leschte Méint hätte kloer gewisen, datt et net duergoe géing, wann d'Memberstaaten onkoordinéiert op russesche Provokatioune reagéiere géingen. Et misste Mechanisme geschaf ginn, fir dorop ze reagéieren. Iwwerdeems misst eng Agenda vu gemeinsame strategeschen Interesse vu Russland an der EU opgestallt ginn, zum Beispill wann et ëm de Klimaschutz geet, oder Konflikter a Libyen oder Syrien.

Diskutéiert gëtt och iwwert d’EU-Verhältnis zu der Tierkei. D’Kommissioun zu Bréissel huet am Virfeld e weideren Milliardepak fir Ankara proposéiert, als Hëllef beim Versuerge vu syresche Flüchtlingen.

Och e Sujet wäert zu Bréissel dann och sécherlech dat ëmstriddent ungarescht Homosexuellen-Gesetz sinn, dat vun enger Apperzuel u Memberlänner an och vun der EU-Kommissioun selwer kritiséiert gëtt.

De Xavier Bettel ass fir Lëtzebuerg zu Bréissel derbäi.