Dës soll verbessert, den Dialog mat Moskau erëm opgeholl ginn, esou de Lëtzebuerger Premier Xavier Bettel.

LGBT-Rechter a Russland um EU-Sommet - Rep. Fanny Kinsch

Hie géif sech dofir wënschen, datt d'EU de russesche President Putin an den nächste Méint op Bréissel invitéiert.
Et wier wichteg, an Dossiere wéi dem Iran, Afghanistan oder Belarus, zesumme mat Russland no Léisungen ze sichen.
En éischte Versuch fir esou eng Entrevue, krut en Donneschdeg awer keng Unanimitéit.

De Xavier Bettel iwwer Russland

D'Bundeskanzlerin Angela Merkel: "Man konnte sich heute nicht darauf einigen, dass wir auf Leitungsebene, also auf Chefebene uns sofort treffen. Aber wichtig für mich ist, dass das Dialog-Format erhalten bleibt und dass man daran arbeitet, ich persönlich hätte mir hier einen mutigeren Schritt gewünscht."

De litauesche President Gitanas Nauséda huet dat allerdéngs anescht gesinn... et wier ze fréi, soulaang een net déi geréngsten Ännerunge vu russescher Säit géing gesinn.

"Fir sech elo op en Dialog anzeloossen, ouni rout Linnen, ouni Konditiounen, dat wier e ganz falsche Message. Net nëmmen un eis, un eis Gesellschaften, speziell un d'Gesellschaften an de baltesche Länner, mee och un eis Partner. Et wier eng riseg Enttäuschung fir si, nodeems mer reagéiert hunn op dat wat 2014 an der Ukrain geschitt ass."
Dominéiert gouf de Sommet awer vun engem Thema, dat eigentlech net um Ordre du jour stoung - eng grouss Majoritéit vun de Staats- a Regierungscheffen huet Ungarn schaarf kritiséiert. Eleng Polen soll Ungarn ënnerstëtzt hunn a Slowenien e bëssen. Dat wéinst engem neie Gesetz, dat Informatiounen iwwer Homosexualitéit an Transgeschlechtlechkeet verbitt. Dat wier net dat Europa, an deem hie liewe wéilt, sot de Lëtzebuerger Premier Xavier Bettel.

Xavier Bettel: "Et geet virun allem ëm Millioune vu jonke Leit, déi zesummen an en Dëppe gehäit ginn, mat engem Titel vun engem Artikel deen do ass fir d'Protektioun vu jonke Leit a géint d'Pedophilie an dann ass awer Transsexualitéit, Homosexualitéit oder einfach wat net an de Krom passt do mat am Text an do muss een einfach soen, et gi Limitten zu allem."

"Ech froe jo net, dass een d'Gesetzgebung muss änneren an dass een alles muss legaliséieren, mä et soll een awer evitéieren d'Leit ze stigmatiséieren an d'Gesellschaft ze deelen. Dat ass de Virworf deen ech him gemaach hunn an ech ka mech nach erënneren, wéi ech mat mengem Mann virun e puer Joer mat em zesummen zu Budapest giess hunn, ech hunn ëm och ganz éierlech gesot, dass ech do en anere Victor Orban sëtzen hat, ewéi haut."

De Xavier Bettel iwwert de Victor Orban

Den hollännesche Premierminister Mark Rutte huet de Victor Orban gefrot, firwat en net aus der EU austriede géing, wann d'europäesch Wäerter him egal wieren.

"Et war immens emotionell, ënnert anerem och well de Xavier Bettel, hien ass och homosexuell, hien huet och e Mann, hie war deen éischte Politiker an Europa, oder op d’mannst a sengem Land, dee mat engem Mann bestuet ginn ass... et war richteg emotionell. Jiddereen hat Tréinen an den Aen."

Den ungaresche Premier huet sech net iwwerzeege gelooss, dat ëmstriddent Gesetz zeréck ze zéien. A sengen Aen géif den Text sech och net géint Homosexueller riichten, mä reng den Elteren en exklusiivt Recht op d’Sexual-Erzéiung vun hire Kanner ginn. D'EU-Kommissiounspresidentin hat awer schonn e Mëttwoch annoncéiert, mat alle Mëttel rechtlech dogéint virzegoen.

Um Freideg da steet d'Wirtschaft an d'Relance no der Kris am Mëttelpunkt vum Treffe vun den EU-Staats- a Regierungscheffen.

De kompletten Interview mam Xavier Bettel (25/06/2021)