An de leschte Woche sinn d'Corona-Infektiounen zu Lëtzebuerg ëmmer weider erofgaangen an doduerch gëtt de Grand-Duché elo als "gréng" agestuuft.

An der Woch vum 14. bis den 20. Juni ass den Inzidenzwäert iwwer 7 Deeg pro 100.000 Awunner vun 30 op 14 erofgaangen. D'Entwécklung aus de leschte Woche bréngt mat sech, datt den Europäeschen Zenter fir d'Preventioun an d'Kontroll vu Krankheeten de Grand-Duché op senger Corona-"Ampelkaart" elo als "gréng" astuuft, also als Land mat "schwaacher Inzidenz".

Net gutt op där Kaart sinn de Süde vu Spuenien an d‘Kanaresch Inselen. Spuenien a Portugal si gréisstendeels „orange“ klasséiert, a Frankräich ass et d‘Géigend ëm Paräis an d‘Regioun Auvergne-Rhône-Alpen. De Süde vun Italien ass och „orange“ an och d‘Wallonie a Bréissel an der Belsch, grad wéi bal ganz Holland.

Am Oktober 2020 hat d'EU dës Kaart agefouert. D'Bierger an d'Biergerinne kënne sech zanterhier iwwert d'Kaart um Internet iwwert déi aktuell Corona-Lag an Europa informéieren.