Vum 1. Juli un ass et a wäiten Deeler vun der EU méiglech, eng Corona-Impfung, oder eng iwwerstanen Infektioun, digital nozeweisen.

Covid-Zertifikat an der EU - Reportage Chris Meisch

Pénktlech zur Vakanzenzäit mécht d'EU de Wee fräi fir de Covid-Zertifikat. Vum 1. Juli, vun en Donneschdeg un also, soll engem domat d'Reesen an der EU vereinfacht ginn. Bis ewell fonctionnéiert den digitalen Zertifikat awer nach net an allen EU-Memberlänner. 21 vun de 27 si prett, déi aner ware bis e Mëttwoch nach net un den EU-System ugeschloss (Irland, Malta, Holland, Rumänien, Schweden an Ungarn). D‘Schwäiz, Island, Norwegen a Liechtenstein maachen awer och mat.

Just eng Hand voll Länner wäerten net vun Ufank un dobäi sinn. De President vum EU-Parlament an de President vum Conseil ënnerschreiwen awer en Donneschdeg Mol zu Bréissel d‘Kaderreegeelë fir de Covid-Zertifikat. Eng elektronesch Plattform fir Zertifikater z‘iwwerpréife soll online goen an esou soll ënnert anerem méi sécher kënne gereest ginn.

Bal genee ewéi beim Lëtzebuerger Covidcheck, gëtt beim europäeschen Zeritifkat informéiert, ob eng Persoun entweder geimpf ass, negativ getest ginn ass oder nees gesond vum Covid ass. Soulaang et déi epidemiologesch Situatioun zouléisst, waerte Leit, déi ee vun de Kritären erfëllen, vun Testpflichten a Quarantänë verschount bleiwen. Den digitalen Impfpass ass awer keng Flicht, et soll just eng Alternativ zu den Zertifikater op Pobéier sinn. Den digitale Covidzertifikat ka wéi hei am Land och fir aner Zwecker benotzt ginn, ewéi an de Restaurants oder op eng Veranstaltung ze goen.

D'Memberstaate kënne selwer bestëmmen, wat genee mam Covid-Zertifikat erlaabt ass a wat net a se kënnen natierlech ëmmer d'Noutbrems zéien, an zousätzlech Restriktioune verhänken, falls zum Beispill eng nei Variant et verlaangt. Wéi eng Rechter ee mat deem Pass an engem Land huet, dat ass deels verschidden. Et gëllen d‘Reegele vum respektive Land. Wat iwwregens d‘Delta-Variant ugeet, kënnen d'Länner och trotz Impfung eng Quarantän verschreiwen. Wéi immun ee géint déi verschidde Varianten ass, hänkt ganz vum Impfstoff of, an ob een just 1 oder 2 Dosis brauch.

Wéi gesot, a verschiddene Länner aus der EU ewéi Irland, Malta, Holland, Rumänien, Schweden, Ungarn an Zypern kënnt et wéinst technesche Problemer zu Verspéidungen. D’selwecht am Net EU Land, der Schwäiz. Dës Länner sollen awer bis spéitstens Mëtt August hir Plattformen en Place hunn.

Direkt no der Impfung ouni Restriktioune verreesen ass awer net an all Fall méiglech. Beim 2-Dosen-Impfschema dierf een vun der zweeter Impfung un verreesen oder wann ee schonn de Virus hat, 14 Deeg no der éischter Dosis. Beim 1-Dosis-Impfschema réischt den 14. Dag no der Impfung. Fir Leit, déi vum Covid geheelt sinn, ass de Covid-Zertifikat tëschent dem 11. an 180. Dag nom negativen Test valabel. Bei PCR-Tester fir 72 Stonnen a bei Antigen-Tester fir 48 .

Hei kann et awer nach Ënnerscheeder vu Land zu Land ginn. Fir ee klengen Iwwerbléck ze garantéieren, weist den Internetsite "Your Europe" eng Legend op, wou ee vir all Land seng Restriktioune fënnt.

Lëtzebuerg huet jo och de CovidCheck-System. Dee gëllt hei am Land bei Manifestatiounen, Concerten, a Restauranten, Baren, oder Fitnesszenteren, déi matmaachen.