U sech soll Plastik, deen ee nëmmen eemol benotze kann, wéi Plastiksbesteck a Schallimoen, vun e Samschdeg un an der ganzer EU verbuede sinn.

Déi nei Reegele gëlle vum 3. Juli un an Däitschland zum Beispill, hei am Land awer nach net.

Déi entspriechend EU-Direktiv, op déi sech Enn 2018 gëeenegt gouf, ass hei am Land nach net ëmgesat, mee den entspriechende Gesetzprojet ass um Instanzewee. Firwat d'Direktiv nach net ëmgesat ass, läit dorunner, datt d'Lëtzebuerger Regierung decidéiert huet, se an eng Gesamtreform vum Traitement vum Offall z’integréieren, wat fir en Zécken an der Ëmsetzung gesuergt huet.

Wat gesäit d’Direktiv vir?

De Verbuet betrëfft déi sougenannten "Ee-Wee-Produiten". Och To-Go-Becheren a Becheren aus Styropor dierfen net méi nei op de Maart kommen. Verbuede sinn donieft och Wegwerftelleren, - becheren oder -besteck aus biobaséierten oder biologesch ofbaubarem Plastik. Dat selwecht gëllt fir Geschier aus Kartrong, dat zu engem klengen Deel aus Plastik besteet oder mat enger Folie iwwerzunn ass.

Wat Händler a Gastronomen nach op Stock hunn, däerf nach verkaf ginn, ma si musse sech vun elo u verflichten, op Alternativen aus Glas oder Metall zeréckzegräifen, déi een net just 1 Kéier benotze kann.

Déi nei Reegelung soll dozou bäidroen, déi Onmasse vu Plastik an der Ëmwelt a besonnesch an de Weltmierer massiv ze reduzéieren. Geplangt ass och nach, dass bis d'Joer 2029 op d'mannst 9 vun 10 Plastiksfläsche getrennt musse gesammelt ginn. Et gëtt och festgehalen, dass nei verkaafte Fläschen aus Plastik bis 2025 zu op d'mannst 25% aus recycléiertem Material musse bestoen.

D'Direktiv gesäit awer och vir, datt Etiketten drop hiweisen, wat fir Produite Plastik enthalen an domadder en negativen Impakt op d'Ëmwelt hunn. Dës Etikettéierungsufuerderung betrëfft ënnert anerem Zigarettefilteren, Tamponen, Binden a fiicht Dichelcher. Doduerch sollen d'Leit fir d'Thema sensibiliséiert ginn. Fläschen a Verpackungen, déi méi dacks kënne benotzt ginn, solle gekennzeechent ginn.

Mat Ausnam vu klenge Geschäfter, wou d'Leit och hir eege Verpackunge kënne mathuelen, musse vun 2023 u Cateringsfirmaen, Liwwerdéngschter a Restauranten iwwregens Behälter ubidden, déi méi dacks kënne benotzt ginn. Vun 2022 un dierfe Commercen dann och keng Plastikstute fir Uebst a Geméis méi ubidden.

Déi nei Philosophie ass déi: Fir bal all Plastiksproduit, deen een nëmmen eemol benotze kann, ginn et Alternativen, déi méi dacks kënne benotzt ginn. Eng Langzäitalternativ zum Plastik kéint dann méiglecherweis iessbar Verpackunge sinn, déi aus Brout oder Alge bestinn. Verschidde Supermarchéë schaffe scho mat Verpackungen aus planzlechem Material.

De Verbuet wäert natierlech déi europäesch Plastikindustrie staark impaktéieren. Der zoustänneger Associatioun Plastics Europe no gouf 2019, mat ronn 58 Milliounen Tonne produzéiertem Plastik, en Ëmsaz vu ronn 350 Milliarden Euro generéiert an iwwer annerhallef Millioune Leit sinn an där Branche beschäftegt. Viru kuerzem goufen awer nëmme ronn 9,5 Milliounen Tonnen dovu recycléiert, gutt en Drëttel vum global erëm gesammelte Plastiksoffall.

Lagerbestänn dierfe wéi gesot nach opgebraucht ginn an dat heescht och weiderhin nach verkaf ginn. Et kéint deemno wéi also nach e bëssen daueren, bis de Plastik tatsächlech ganz verschwënnt, zum Beispill geet een an Däitschland dovun aus, dass nach gréisser Quantitéiten op Reserv do sinn.

EcoBoxen - praktesch awer deier

De System vun de weider-verwäertbaren EcoBoxen fir Liewensmëttel ass praktesch, mee huet och säi Präis.

Zanter dem Lancement virun 3 Joer huet dëse System bal 560.000 Euro kascht, aktuell sinn eng ronn 84.000 EcoBoxen am Ëmlaf.

Dat äntwert d'Ëmweltministesch Dieschbourg op entspriechend parlamentaresch Fro vum Piraten-Deputéierte Sven Clement.

Hei ass et och d'Prezisioun, datt och Veräiner kënnen op de System vun den EcoBoxen zeréckgräifen: sief et iwwert d'Gemeng, déi dës Këschten zur Verfügung stellt, Lounen iwwert en externe Service-Provider oder awer sech selwer e Stock un de Liewensmëttelkëschten zouleeën.

Et muss ee wëssen, datt d'EcoBoxe mussen professionell virum an nom Gebrauch gespullt ginn.