Dofir misst een elo kucken, sech ëm sech selwer ze këmmeren: sot de Verdeedegungsminister François Bausch en Donneschdeg.

Den Haaptsujet um EU-Defense-Sommet war den Opbau, respektiv d'Organisatioun vun enger europäescher Arméi. En Thema, iwwert dat schonns zanter Joerzéngten ëmmer erëm diskutéiert gëtt. D'Kris an Afghanistan léisst Europa d'Urgence awer erëm op en neits spieren. Ouni amerikanesch Ënnerstëtzung hätten déi verschidde Länner vun der Unioun net d'Moyene gehat, de Fluchhafen zu Kabul ze sécheren an d'Leit ze evakuéieren. De Minister François Bausch erkläert, datt déi gefuerdert europäesch Autonomie eng nach méi grouss Roll kéint spillen.

"Stellt iech emol vir, mir hätten eng änlech Situatioun wéi um Fluchhafen zu Kabul op enger anerer Plaz. Zum Beispill an der Sahelzon, wou d'europäesch Unioun jo ganz aktiv ass a wou net d'Vereenegt Staaten do sinn, fir e Fluchhafen ofzesécheren. Dann hätte mer direkt gréisser Problemer. D'Europäesch Unioun muss selwer fäeg sinn, esou eppes ze maachen."

Dofir muss awer all Land e Stéck Souveränitéit ofginn, wat grousse Länner méi schwéier fält ewéi Lëtzebuerg. Mee et misst ee sech awer agestoen, datt an enger globaliséierter Welt sech souwisou kee méi kéint selwer verdeedegen, ënnersträicht de Minister. Dofir ass eng europäesch Struktur néideg, déi am Asaz de Lead huet.

"A fir datt dat de Fall ka sinn, musse se sech zesummen organiséieren. Se musse wierklech dee System Pooling and Sharing verdéiwen. Se muss kucken, dass och eng Trupp opgestallt gëtt, net eng europäesch Arméi, mee eng Trupp, déi zesummegesat gëtt aus Zaldote vu villen europäesche Länner."

Wéi déi Kooperatioun soll funktionéieren, mussen d'Memberstaaten nach ofklären. Als Pist kéint hei d'Kooperatioun tëscht Lëtzebuerg an der Belsch déngen.

"Et geet dorëms, datt déi 27 Länner kucken, wéi se vun hiren Arméie gemeinsam Bataillounen opstellen. Déi dann natierlech am Déngscht sti vun der europäescher Unioun, wann et drop ukënnt. Fir d'Gesamtunioun. Mee et ass e bëssen dat, wat mir mat de Belsch maachen, wat och e Virbild kéint gi fir de Rescht."

De François Bausch betount awer och, dass et wuel utopesch wier ze denken, déi 27 Memberstaate géingen direkt matzéien. Trotzdeem soll net méi gewaart ginn.

"Warscheinlech leeft et dorop eraus, datt et fir d'éischt zu enger Koalitioun vu 15, 16 Länner kënnt, déi direkt bereet sinn, an déi Richtung ze goen. A meng Meenung ass och, datt wann dat de Fall soll sinn, da sollen déi Länner emol en éischte Schratt maachen. An ech sinn iwwerzeegt, datt kuerz an och mëttelfristeg gesi kee méi do derlaanscht kënnt. Well et ka kee sech méi an där Welt, an där mer haut liewen, eleng verdeedegen."

Hien ass awer och dovunner iwwerzeegt, datt Ressourcen zesummeleeë mëttelfristeg méi bëlleg gëtt, wéi wa jiddereen säin eegent Material keeft a sech selwer organiséiert.