EU-Kommissioun seet sech besuergt iwwert Urteel vum polnesche Verfassungsgeriicht, dat Deeler vun den EU-Traitéen als verfassungswiddreg klasséiert huet.

D'polnesch Regierung spillt mam Feier a kéint e politesche Broch mat der EU provozéieren - dat sot de Lëtzebuerger Ausseminister e Freideg de Moie bei senger Arrivée op der Reunioun vun den Inneminister um Kierchbierg.

En Donneschdeg hat d'polnescht Verfassungsgeriicht en historescht Urteel geholl, datt EU-Recht net iwwert nationaalt Recht priméiert. D'Geriicht hat Deeler vun den EU-Verträg als verfassungswiddreg erkläert an huet der EU reprochéiert, sech onrechtméisseg a Polen anzemëschen, wat déi ëmstridde Justizreformen ugeet.

Wann d'Regierung d'Urteel vum Geriicht ënnerstëtze géing, misst een dovunner ausgoen, dass do e System hannendru stieche géing, esou de Jean Asselborn.

"Seit Ende 2015 wird in Polen auf nationaler Ebene die Justizordnung gebrochen und jetzt sind wir in einer zweiten Phase, wo Schritt für Schritt auch dann der Vorrang des europäischen Rechts soll gebrochen werden. Das wird zu einer Schlussfolgerung führen, dass man das Wort "Union" bei Europäischer Union vergessen muss. Die Gemeinschaft vergessen muss. Der Vorrang des europäischen Rechts ist Kapital für die Integration Europas und für das Zusammenleben in Europa. Wenn das gebrochen wird, wird Europa in der Form, wie wir es kennen, wie es aufgebaut wurde nach den Römer Verträgen, nicht mehr bestehen."

De polnesche Premierminister Mateuzs Morawiecki huet sengersäits e Freideg de Moie verséchert, Polen wéilt Deel vun der Europäescher Unioun bleiwen. An engem Facebook-Post huet hie geschriwwen, Urteeler vu Geriichter an anere Länner géingen der Virrang vun EU-Recht och a Fro stellen.

EU-Membere wéi Däitschland a Frankräich hu Polen nach eng Kéier dozou opgeruff sech un déi europäesch Reegelen ze halen. EU-Member ze sinn géif nëmme goen, wann ee sech un déi gemeinsam Wäerter a Reegele géif halen, esou d'Ausseminister Heiko Maas an Yves Le Drian. Ma och déi polnesch Populatioun ass net mat dësem Urteel averstanen. Fir e Sonndeg si gréisser Protester dogéint geplangt.