Polnesch Gewerkschaftler an Demonstranten hu sech wéinst engem Geriichtsurteel um Kierchbierg virum Europäesche Geriichtshaff versammelt.

D'Demonstratioun um Kierchbierg ass friddlech verlaf, d'Police huet ëm 1.000 Persounen op der Plaz geschat, déi extra dofir aus Polen ugereest waren. Virop waren d'Leit virum Europäesche Geriichtshaff, wou Rieden op polnesch gehale goufen, déi sech haaptsächlech géint d'EU geriicht hunn, wéi RTL gesot krut. Vum Geriichtshaff goung et da géint 11.20 weider a Richtung tschechesch Ambassade. Géint 13 Auer sinn d'Demonstrante vum Glacis aus nees a Polen gefuer.

D'Leit op der Plaz sote virun allem, dass si Angscht hunn hir Aarbecht ze verléieren. Eng 10.000 Leit schaffen effektiv an oder fir d'Turow-Minn. Och d'Suerg, dass d'Elektresch am Wanter knapp gëtt, wann d'Kueleminn Turow zoumaache muss, ass bei de Leit grouss. Da fäert een de Stroum aus Däitschland mussen ze kafen.

Eng 15 Polen, déi zu Lëtzebuerg wunnen, hate sech bei der Philharmonie fir eng Géigendemo versammelt. Si wollte sech, fir d'EU ausschwätzen. An och dofir, dass Polen an der Europäescher Unioun soll bleiwen.

Police: Manifestante ware friddlech

Déi ronn 1.000 Polen, déi op de Kierchbierg koumen, fir ze manifestéieren, si friddlech bliwwen, schreift d'Police e Freideg am Nomëtteg. Déi éischt Persoune koume géint 8 Auer um Kierchbierg un am Laf vum Moie koumen ëmmer weider Busser un, esou datt eng 1.000 Leit sech hei versammelt hunn. Géint 11 gouf et dunn e Cortège, dee vun de Poliziste begleet gouf, vum EU-Geriichtshaff bis bei déi tschechesch Ambassade, déi beim Rond-point Schumann ass. Wärend dësem Deel vun der Maniff huet de Boulevard Kennedy a Richtung Stad misste blockéiert ginn. De Rond-point Schumann selwer war bis 13 Auer net accessibel.

Eng 840 Polizisten, ënnerstëtzt vun 100 Kolleegen aus der Belsch, waren wärend dëse Stonnen am Asaz. D'Beamte bleiwen dann och nach de Recht vum Dag um Kierchbierg an am Zentrum vun der Stad present.

Urteel vun EU-Geriichtshaff Grond fir Maniff

D'Urteel vum Europäesche Geriichtshaff, wéinst deem Polen all Dag 500.000 Euro Strof un d'Europäesch Kommissioun muss bezuelen, ass de Grond wisou sech Schätzunge vun der Police no eng 1.500 Demonstranten um Kierchbierg virum Geriichtshaff versammelt hunn.

Schonn am Mee 2021 gouf Polen opgefuerdert d'Kueleminn Turow zouzemaachen. D'Wierk steet a Polen direkt un der tschechescher Grenz. Tschechien huet kritiséiert, dass de polneschen Ëmweltministère de Betrib vun der Kueleminn bis 2026 verlängert huet, obwuel déi néideg Etüden iwwert d'Auswierkungen op d'Ëmwelt net virleien. Dofir hu si géint Polen geklot. Den 20. September 2021 dann d'Urteel vum Europäesche Geriichtshaff. Polen muss d'Strof esoulaang bezuele wéi si hir Aktivitéiten zu Turow net astellen.

Fir Polen ass kloer: Et wëll een d'Kueleminn net zoumaachen. Turow wier e wichtegen Employeur an dëser Géigend. Ze vill Aarbechtsplaze wieren dovun ofhängeg. Dobäi kënnt, dass Turow immens wichteg fir d'Stroumproduktioun an der Regioun wier, sou d'Polnesch Regierung.

Schonn am Virfeld hunn d'Autoritéite mat op d'mannst 2.000 Demonstrante gerechent. Dofir waren zënter dem Mëttwoch Preparatioune virum Geriichtshaff gelaf. Eng 840 Poliziste hunn op der Manifestatioun fir d'Sécherheet gesuergt. Dorënner och ronn 100 Belsch Polizisten als Verstäerkung.