Mat Debatten iwwer d'Rechstaatlechkeet a klammend Energiepräisser kéint et um Sommet vun den europäeschen Staats- a Regierungscheffen hëtzeg ginn.

D‘Hausse vun den Energiepräisser hätt als Sujet eigentlech schonn en EU-Sommet fir sech verdéngt. Ma och de Sträit mat Polen iwwer d‘Justizreform, Migratioun an d‘Covid-Pandemie stinn den Donneschdeg an de Freideg zu Bréissel um Ordre du jour vun den EU-Staats- a Regierungscheffen. Et kéint nees en Rendez-Vous mat hëtzegen Debaten ginn.

Et hätt een e Wiertchen mam polneschen Ministerpresident Mateusz Morawiecki ze schwätzen, esou de Konsens bei Renew Europe, den europäesche Liberalen, de Moien am Virfeld vum Sommet. Am staarke Reen stoung och de Lëtzebuerger Premier Xavier Bettel der Presse Ried an Äntwert.

Den EU-Sommet zu Bréissel / Reportage vum Pierre Jans

Et geet ëm déi ëmstridde Justizreform a Polen. Aus der Siicht vun der EU verursaacht déi Abuse géint de Prinzip vun der Rechtsstaatlechkeet. Am Resumé war de Konflikt rezent nees eskaléiert, well dat polnescht Verfassungsgeriicht an engem Urteel festgehalen huet, dass d‘EU-Recht deels net kompatibel mat der Constitutioun vu Polen wär. An deene Fäll stéing déi national Justiz iwwer der europäescher.

D‘Europäesch Unioun fäert, an Zukunft géif Polen doduerch Urteeler vum Europäescher Geriichtshaff zu Lëtzebuerg – der héchster Instanz a Saachen Justiz an der EU – net méi akzeptéieren.

Beim Rendez-Vous vun den europäesche Liberalen de Moien zu Bréissel huet de Premier Xavier Bettel vun engem polnesche Justizsystem geschwat, deen als net onofhängeg qualifizéiert ginn ass. Wann d‘Regierung a Polen un der Justizreform festhält, hätte polnesch Biergerinnen a Bierger an och Entreprisë manner Rechter ewéi anerer an der EU, esou huet de Lëtzebuerger Staatsminister ze bedenke ginn.

Et géif hei ëm d‘Architektur vun Europa goen. De Xavier Bettel seet, hie géif et och net akzeptéieren, wann de polnesche Ministerpresident Morawiecki aner Dossieren, ewéi beim Klima zum Beispill, blockéiere géing. Dat wär Erpressung.

Energiepräisser beschäftegen d'Ronn

Déi héich Energiepräisser stinn och ganz uewen um Ordre du jour vum EU-Sommet den Donneschdeg. Ob Sprit a Brennes, Gas oder Stroum: alles geet staark an d‘Luucht.

E puer Memberstaaten ewéi Spuenien a Frankräich si méi concernéiert ewéi anerer. Si fuerdere séier Mesuren, quasi eng Garantie, dass d‘Unioun eppes géint déi Präishausse ënnerhëlt. Spuenien hätt gär eng reegelrecht Reform vum Stroummarché. D‘Kommissiounspresidentin Ursula von der Leyen sot am Virfeld vum Sommet si wär kompromëssbereet. Et ginn och Proposen diskutéiert, ewéi déi, sech zesummen Äerdgas-Reserven unzeleeën oder gemeinsam anzekafen.

Kuerzfristeg wären nëmmen national Léisunge méiglech, sot de Lëtzebuerger Premierminister Xavier Bettel beim Meeting vun der europäescher Partei vun de Liberalen "Renew Europe" zu Bréissel. Grad ewéi déi däitsch Kanzlerin Angela Merkel schwätzt de Premier vu soziale Kompensatiounsmesuren.

Doheem géif een de Leit jo beim REVIS entgéint kommen. Den europäeschen Energie-Bannemaart dierft een awer net opginn. Op kee Fall dierf d‘Diskussioun iwwer d‘Energiepräisser elo de Klimaschutz bremsen, betount de Xavier Bettel, deen sech och virun der internationaler Presse kloer géint Atomenergie expriméiert huet.