Wéi ass et ëm d'Rechtsstaatlechkeet zu Lëtzebuerg bestallt? D'Zensur vun der EU-Kommissioun fält gutt aus, mä an engem Beräich gëtt et awer een Noexamen!

Et geet ëm de sougenannten "Droit à l'information", also dass d'Journaliste bei hire Recherchë keng Steng an de Wee geluecht kréien, wa si Informatiounen an Dokumenter bei ëffentlechen Administratiounen ufroen. Net nëmmen d'Lëtzebuerger Journalistenassociatioun fuerdert do scho méi laang e bessere legale Kader, och d'Europäesch Kommissioun wëll, dass Lëtzebuerg hei nobessert. Den Didier Reynders, EU-Kommissär fir Justiz: "Do bleift nach vill ze dinn, fir den Accès op offiziell Dokumenter z'amelioréieren. Dat ass eng Fro, déi sech an der ganzer EU stellt, an ech hoffen, dass dat eng vun den nächste Reform-Etappen ass, déi Lëtzebuerg an Ugrëff hëlt."

Soss huet den Didier Reynders e Méindeg de Moien éischter "bonnes notes" verdeelt. Hien huet ausdrécklech gelueft, dass d'Remarke vum éischte Rapport vun der EU-Kommissioun bei der Verfassungsrevisioun berécksiichtegt goufen, notamment wat d'Zesummesetzung vum zukünftegen Nationale Justizrot ugeet: "Do wäerten elo majoritär Riichter dra sëtzen, déi vun anere Riichter gewielt goufen. Dat ass wichteg, fir d'Onofhängegkeet vun der Justiz ze garantéieren. Dat ass zwar zu Lëtzebuerg schonn duerchaus de Fall, mä wann esou Reformen ëmgesat ginn, dann ass dat och e gutt Beispill fir aner Länner, wou mir grad dee selwechten Debat féieren."

D'Diskussioun ëm d'Rechtsstaatlechkeet, déi gëtt an dëse Wochen och intensiv op der Strooss gefouert, wann op der sougenannter Marche Blanche symbolesch d'Demokratie begruewe gëtt. Esou Mouvementer verwonneren den Didier Reynders net, dee seet, d'Politik misst hir Mesurë besser erklären: "D'Kris huet ganz staark Restriktioune mat sech bruecht. Déi individuell Rechter goufen zum Deel massiv ageschränkt, beispillsweis am Confinement. An ech mengen, dat huet ville Leit eréischt bewosst gemaach, wéi wichteg hir Grondrechter sinn. Elo geet et drëms, d'Bierger z'iwwerzeegen, dass d'Mesurë wierklech noutwendeg a verhältnisméisseg sinn."

Den Dialog tëscht den Institutiounen am Grand-Duché an der Kommissioun iwwerdeems wär gutt, ënnersträicht den Didier Reynders. Den drëtte Rapport iwwert d'Rechtsstaatlechkeet ass schonn an der Maach, an dee wëll nieft enger Bestandsopnam dann och konkret Verbesserungsvirschléi, beispillsweis a Saache Pressefräiheet maachen.