E Sonndeg komme Vertrieder vun EU-Länner an der EU-Kommissioun beieneen, fir iwwert d'Situatioun am Äermelkanal ze beroden.

Frankräich hat dës Reunioun aberuff, nodeems lescht Woch 27 Mënschen ëm d‘Liewe komm waren, wéi hiert Boot ënnergaangen ass. Am Virfeld vun dëse Consultatiounen haten Hëllefsorganisatiounen dann op en Neits gefuerdert, dass legal Migratiounsweeër en place gesat ginn.

Och de Lëtzebuerger Ombudsman fir Kanner a Jugendlecher huet, zesumme mat sengen Homologen aus Frankräich an der Belsch, an engem Communiqué un d‘Politik appelléiert, d‘Kanner un de Grenze vun Europa besser ze schützen, sief et viru Passeuren oder sougenannte Pushbacks. D‘Rechter vum Kand missten iwwert allem stoen, egal wéi e legalen oder administrative Statut et huet.

D‘Invitatioun fir dës Reunioun un déi brittesch Inneministesch gouf wéinst engem Bréif vum brittesche Premier u Frankräich zeréckgezunn. Doran hat den Johnson ënnert anerem gemeinsam Police-Patrullen laanscht déi franséisch Côte gefuerdert fir ze verhënneren, dass Flüchtlingen illegal a Groussbritannien kommen. Allerdéngs hat hien de Bréif gläichzäiteg och op Twitter publizéiert, wat zu engem diplomateschen Eclat gefouert huet.

Kritik um Sträit tëscht London a Paräis kënnt an Tëscht och vun der Oppositioun a Groussbritannien. Béid Länner géife wichteg Zäit domat verléieren, sech géigesäiteg d‘Schold fir de Problem ze ginn, wärend an der Manche Kanner stierwen. Dat wier skrupellos, esou eng Porte-Parole vun der Labour-Partei.