Ënnert anerem den däitsche Klimaschutzminister Habeck huet sech dogéint ausgeschwat an d'Pläng vun der EU-Kommissioun staark kritiséiert.

D'Kriticke géint de Plang vun der EU-Kommissioun, fir Gas an Atomenergie als klimafrëndlech wëllen anzestufen, ginn ëmmer méi haart.

D'Kommissiounspresidentin Von der Leyen géing mat deem Plang dofir suergen, dass den Öko-Zertifikat net méi glafwierdeg ass. Esou den däitsche Politiker Michael Bloss, klimapolitische Spriecher vun deene Gréngen am Europaparlament.

Ëmweltschutzorganisatiounen geheien der EU vir, d'Atomkraaft ze privilegéieren an domadder grousse Wirtschaftsnatiounen e Gefalen ze maachen. Effektiv ass de Projet vun der Kommissioun souwuel am Sënn vum franséische President Macron, wéi och vum däitsche Bundeskanzler Olaf Scholz.

Wärend Frankräich scho Rekord-Zommen an den erneiten Ausbau vun Atomwierker stécht, géing den Olaf Scholz haaptsächlech vum Nohaltegkeetszertifikat fir d'Energie aus Gaskraaftwierker profitéieren.

De Virschlag aus Bréissel stellt domadder och fir d'éischte Kéier d'Ampel-Koalitioun an Däitschland op d'Prouf. De grénge Politiker Robert Habeck huet sech nämlech kritesch géintiwwer den neien Taxonomie-Reegele gewisen.

"Ausgerechent Atomenergie als nohalteg z'etikettéieren, ass bei dëser Héichrisikotechnologie falsch", sou den däitsche Politiker e Samschdeg. Dëst géing de Bléck op laangfristeg Auswierkunge fir Mënsch an Déier verstellen an den héichradioaktiven Atomdreck d'Mënschen iwwert Joerhonnerte belaaschten. An et géing och u Sécherheetskrittäre feelen, kritiséiert de grénge Minister.

Taxonomie ass eng Aart Klassifizéierung vun nohaltege wirtschaftlechen Aktivitéiten. Autorisatioune fir de Bau vun neien Atomkraaftwierker sollen dem Entworf no bis 2045 ënnert déi sougenannten Taxonomie falen a kéinten entspriechend gefërdert ginn. Fir nei Gasinfrastrukture soll dëst ënnert bestëmmte Viraussetzunge bis 2030 gëllen.

"D'Virschléi vun der EU-Kommissioun verwässeren de gudde Label fir Nohaltegkeet", sou nach den Habeck. D'Bundesregierung wäert den Entworf deemnächst beschwätzen a bewäerten.

Wéi et aus Bréisseler a Berliner Kreesser heescht, wier den Entworf op Silvester un d'Regierunge vun de 27 Memberstaate verschéckt ginn.

Virun allem Frankräich, Polen an aner ëstlech EU-Staate maachen Drock, fir datt d'Atomkraaft vun der EU-Kommissioun als nohalteg agestuuft gëtt. Lëtzebuerg, Däitschland an Éisträich hate sech dogéint ausgesprach.