De President vum Europaparlament ass an der Nuecht op en Dënschdeg am Alter vun 65 Joer an engem Spidol zu Aviano an Italien gestuerwen.

Dat huet säi Porte-parole confirméiert.

Zanter Enn Dezember war hien an engem Onkologie-Center hospitaliséiert, wéinst schwéiere Komplikatiounen opgrond vun enger Funktiounsstéierung vum Immunsystem.

Den David Sassoli war zanter Juli 2019 de President vum EU-Parlament, wou hien 2009 eragewielt gouf. De fréiere Journalist hannerléisst eng Fra an zwee Kanner.

En Dënschdeg de Mëtteg huet d'Presidentin vun der EU-Kommissioun Ursula von der Leyen an enger offizieller Erklärung der Famill vum David Sassoli hiert Bäileed ausgedréckt. De President vum Europaparlament wier e Mann mat déiwem Glawen a staarken Iwwerzeegunge gewiescht, deen déi europäesch Unioun an hir Wäerter ëmmer verdeedegt huet, Europa awer och hätt wëlle weiderbréngen.