En Dënschdeg de Moie koum d'EU-Parlament zu Stroossbuerg beieneen, fir nom Doud vum David Sassoli en neie President ze wielen.

En Dënschdeg de Moie gouf am Europaparlament zu Stroossbuerg eng nei Presidentin gewielt. An nëmmen engem Waltour gouf déi konservativ maltesesch Deputéiert Roberta Metsola mat enger absolutter Majoritéit gewielt. Si huet sech géint zwou Géigekandidatinnen duerchgesat. Domat ersetzt si den Italiener David Sassoli, dee lescht Woch stënterlech gestuerwe war. Déi 43 Joer al Juristin ass fir zwee an en halleft Joer gewielt an ass eréischt déi drëtte Fra an där Positioun.

D'Roberta Metsola, déi och schonn den Interim iwwerholl hat an déi éischt Vizepresidentin vum Parlament war, hat vu vireran als Favoritin fir d'Successioun gegollt. Si ass déi jéngst Persoun op dësem Posten an der Geschicht vum EU-Parlament. Nieft der Roberta Metsola, haten och déi Gréng, déi Lénk an déi Nationalkonservativ am Europaparlament eege Kandidaten nominéiert, deenen awer just geréng Chancen zougestane goufen.

Nei Presidentin am EU-Parlament / Maxime Gillen

Déi 43-Joer-al Juristin gouf vun engem groussen Deel vun Deputéierten aus der Mëtt vum politesche Spektrum an aus dem konservative Lager ënnerstëtzt. Ma zur absolutter Favoritin fir de Posten ass si ginn, nodeems och d‘Sozialisten e Méindeg annoncéiert haten, fir si ze stëmmen. Dëse Support ass d‘Resultat vun engem Deal tëscht de Sozialisten an deenen anere grousse Fraktiounen am Parlament, bei deem hinnen eng Rei aner wichteg Poste versprach goufen.

D‘Malteserin huet sech kloer géint eng schwedesch Deputéiert vun deene Gréngen an eng spuenesch Deputéiert vun deene Lénken duerchgesat.

D‘Roberta Metsola ass fréier Staatsbeamtin, ma huet de Gros vun hirer Karriär zu Bréissel gemaach a sëtzt zanter 2013 als Deputéiert am Europaparlament.

An de leschte Joren huet si sech ëmmer erëm dofir agesat, dass Flüchtlingen uechter ganz Europa verdeelt ginn an och an hirem Heemechtsland géint Korruptioun staark gemaach. Op engem Punkt eckt si awer reegelméisseg un mat hire Bréisseler Parteikolleegen. Si huet sech an der Vergaangenheet nämlech ëmmer erëm aktiv géint Ofdreiwung agesat.

Op Malta, engem gréisstendeels kathoulesche Land, ass et als eenzegt EU-Land nach ëmmer illegal, eng Schwangerschaft ofzebriechen. Mëtt lescht Joer huet si nach géint e Rapport gestëmmt, deen ofdreiwen als Mënscherecht definéiert huet.

D'Roberta Metsola selwer ass Mamm vu véier Bouwen a bestuet mat engem finnesche Lobbyist fir d‘Croisièresindustrie.

Fir den David Sassoli war e Méindeg zu Stroossbuerg eng Gedenkzeremonie. Nieft dem Rotspresident Charles Michel an der EU-Kommissiounscheffin Ursula von der Leyen, hunn och d'Fraktiounscheffen eng Ried gehalen.

RTL

D'Roberta Metsola e Méindeg bei hirer Ried zur Éierung vum fréiere President David Sassoli. / © AFP Archiv

Den Zäitpunkt vun der Wal huet awer näischt mam Doud vum David Sassoli ze dinn, deem seng regulär Amtszäit souwisou am Januar no zwee an en halleft Joer fäerdeg gewiescht wier.

De President vum EU-Parlament leet all Plenièresaktivitéiten, suergt fir Uerdnung bei de Sëtzungen, gëtt d'Wuert un d'Spriecher an ënnerschreift Gesetzer. Donieft ass et och Usus, datt de President bei der Ouverture vun EU-Sommeten eng Ried hält.