Et ass eng Première zanter iwwer 10 Joer: Déi Europäesch Zentralbank huet de Leetzëns an d'Luucht gesat.

D'Europäesch Zentralbank laut d'Enn vun den der Nullzënspolitik an. D'EZB huet en Donneschdeg zu Amsterdam annoncéiert, datt d'Leetzënsen um nächste Conseil vun de Gouverneuren den 21. Juli eng éischte Kéier zanter iwwer 10 Joer an d'Luucht ginn, an zwar ëm 0,25 Prozentpunkten. Dobäi soll et awer net bleiwen. Jee no Inflatiounsprognos wier eng "gréisser" Zënshausse am September denkbar.
Wéi héich de Leetzëns dann erop geet, hänkt dovunner of wéi sech d'Inflatioun weider entwéckelt. An och weider Hausse kéinten nokommen.

"Iwwer September raus gi mer, op Basis vun eisen aktuelle Previsiounen, dovunner aus, datt graduell méi nohalteg Haussen appropriéiert sinn. Ajustementer vun eiser Geldpolitik, fir d'2-Prozent-Zil bei der Inflatioun ze erreechen, hänkt vun den Donnéeën an der mëttelfristeger Entwécklung vun der Präisdeierecht of".

Fir dëst Joer geet d'Europäesch Zentralbank vu 6,8% Präisdeierecht an der Moyenne aus, gedriwwen notamment duerch déi héich Energie- a Liewensmëttelpräisser. D'nächst Joer kéint d'Inflatioun dann op 3,5% zréckgoen. Datt déi geplangten Zënshausse en direkten Impakt op d'Inflatioun hätt, dovunner wier net auszegoen.

Enn dës Mounts schonn ass Schluss mam milliardeschwéiere Programm, fir Obligatiounen am grousse Stil opzekafen. Fir den Ament bleift de Leetzëns nach bei Null Prozent. Banke mussen och nach 0,5 Prozent Zënse bezuelen, wa se Sue bei der EZB parken. D'EZB-Cheffin Christine Lagarde hat an Aussiicht gestallt, d'Negativzënse kéinte bis Enn September auslafe gelooss ginn.

D'Europäesch Zentralbank stoung an de leschte Wochen ëmmer méi ënner Drock, fir mat geldpolitesche Mesuren op déi historesch héich Inflatioun vun ze lescht bal 8 Prozent ze reagéieren. Mëttelfristeg strieft d'EZB fir déi 19 Länner vun der Eurozon eng stabil Inflatioun vun 2 Prozent d'Joer un. Aner Zentralbanke wéi déi amerikanesch Federal Reserve an d'Bank of England hunn hir Leetzënse wéinst der historescher Präisdeierecht schonn e puer Mol gehuewen. Och den aktuelle Schrëtt hale verschidden Analyste fir net determinéiert.