"Et gëtt deemno wéi e ganz haarde Wanter fir all d'Lëtzebuerger, fir all d'Europäer" an dat Wichtegst wier ze spueren, sot den Energieminister e Méindeg.

Dat no enger Reunioun vun de 27 EU-Energieministeren um Kierchbierg.
Nodeems de russesche Konzern Gazprom d'Liwwerung vu Gas an d'europäesch Unioun deels staark limitéiert huet, wier d'Situatioun dem Lëtzebuerger Minister no "ganz eescht", besonnesch fir d'Leit mat klenge Revenuen.

"Mir si lo an engem bras de fer mat Russland a mir mussen oppassen dass mir eis net géinteneen ausspille loossen - dat hunn alleguer d'Minister erkannt."

Dowéinst wier et wichteg gewiescht, deene Leit mat de Steierkreditter an der Allocation vie chère ze hëllefen an d'Versuergungssécherheet ze garantéieren.

No Pëtrol a Kuelen ass Naturgas mat 21 Prozent drëtt Energiequelle an Europa. Lëtzebuerg ass wéineg vu russeschem Gas ofhängeg, hänkt awer vum belsche Maart of. D'Belsch huet mat Zeebrugge een Hafe fir flësseg Gas an ass un Holland respektiv England ugebonnen, wat selwer nees un Norwegen ugeschloss ass.

"Mir hunn duerch de belsch-Lëtzebuerger Gasmarché een Joker. Wann dat Ganzt awer lo méi am groussen europäesche Kader organiséiert gëtt, muss d'Belsch solidaresch gi mat aneren a Lëtzebuerg och."

Hien huet an deem Sënn begréisst, datt d'EU bis den 1. November de Gas wäert op bis zu 80-90% vun de Stock-Capacitéite wäert opstocken. Eng gutt Nouvelle wier a sengem A och, datt d’Ministere sech eens gi wieren iwwert eng nei Direktiv iwwert d'Energieeffizienz an d'Verhandlungen elo mam EU-Parlament kéinten ugoen. Dat selwecht géing d'Direktiv iwwert d'erneierbar Energien ugoen.

Dat Wichtegst, dat wier awer, wéi gesot, d'Spueren. "Déi bescht Energie ass déi, déi ni verbraucht gëtt", sou de Claude Turmes. Dem Energieminister no kéint jidderee graff op d'mannst 10% spueren an dat wier och gutt fir de Portmonni. D'Ziler vun erneierbaren Energië solle parallel vun 20 Prozent am Joer 2020 op 40 Prozent 2030 eropgesat ginn an d'Gasspäicher bis November ëm 80 bis 90 Prozent gefëllt ginn.

Um Internetsite energiespueren.lu géing et scho Rotschléi ginn. Fir den Eeschtfall, wou Russland de Krunn ganz zoudréint a rationéiert misst ginn, ginn et Prioritéiten.

"D'Hëtze vun de Leit, d'Hëtze vu kriteschen Infrastrukturen ass geschützt, dat sinn déi aller-, allerlescht déi vum Netz ginn - dat si geschützte Consommateuren. An da kommen déi net-geschützten an dat sinn d'Industriell an déi kleng a mëttel Betriber."

Wéi eng Betriber als éischt missten ouni Gas eens ginn, wollt de Minister net nennen, obwuel et e Plang an eng Lëscht gëtt. D'Nimm vun de Betriber sinn an där Lëscht aus Dateschutzgrënn anonymiséiert ginn, mee se wieren am Austausch mat den Netzbedreiwer, huet et nach um Bord vun der Pressekonferenz geheescht.

Energieminister Claude Turmes am Interview
E Méindeg sinn déi 27 EU-Energieministeren um Kierchbierg zesumme komm, fir iwwert e méigleche Versuergungsproblem duerch de russesche Krich ze beroden.

EU kritt aktuell Gasreserven opgebaut, mä dat soll net täuschen

Dat sot den däitsche Minister Robert Habeck bei senger Arrivée e Méindeg hei zu Lëtzebuerg. Am Wanter wier d'Situatioun eng aner.

Russland huet 12 EU-Memberstaaten de Gas-Krunn ganz oder zum Deel zougedréint. D’EU-Kommissärin fir Energie, d’Kadri Simson, huet um  Méindeg de Moien bei hirer Arrivée op engem Treffe vun den EU-Energieministeren hei zu Lëtzebuerg vun "Erpressung" geschwat. D’Erklärung vu Moskau, d’Liwwerunge géinge just aus technesche Grënn limitéiert ginn, gëtt also net Eescht geholl.

D’EU-Kommissioun an d’Ministere géingen dowéinst am Juli scho weider Propose presentéieren, fir ze verhënneren, datt een am Wanter misst de Gas rationéieren. Am Mee war schonn decidéiert ginn, datt d’Gas-Lager bis den 1. November op 80% vun hirer Capacitéit sollen opgefëllt ginn an am Moment géing et trotz manner Gasliwwerungen zum Deel klappen, sou den däitsche Minister Robert Habeck e Méindeg de Moien hei um Kierchbierg. Hien huet awer gewarnt, et soll ee sech doduercher net täusche loossen, well am Wanter wier d’Situatioun eng aner. Dowéinst géing elo mat "Héichdrock" dru geschafft ginn, fir méi Gas ze stockéieren an anzespueren.

Fir onofhängeg vu russeschem Gas ze ginn, probéiert d’EU och d’erneierbar Energien auszebauen an d’Energie-Effizienz an d’Luucht ze setzen. D’Energieministeren huelen um Méindeg zwee wichteg Texter ënnert d’Lupp, sou d’franséisch Ministesch fir d’transition énergetique, d’Agnes Pannier-Runacher, di de Conseil presidéiert. Ob d’EU-Ministeren op e gréngen Zweig kommen, gëtt een um Méindeg de Mëtte gewuer. De Lëtzebuerger Energieminister Claude Turmes gëtt um 14 Auer eng Pressekonferenz.