Am Kader vum Gas-Noutfall-Plang fuerdert d'EU-Kommissioun, datt all EU-Memberstaat säi Verbrauch ëm 15% reduzéiert a setzt heifir nach op Solidaritéit.

Wéi sensibel d'Thema ''russesch Gas-Liwwerungen" ass, weist eng Zuel: Wéi en Dënschdeg bekannt gouf, datt Gazprom weider a Richtung Europa liwwere wäert, ass zu New York op der Bourse den Dow-Jones ëm 700 Punkten an d'Luucht geschoss. Grad där Reaktiounen eng, déi zu Moskau dem Putin nach méi en Androck vu Muecht gëtt. A grad dofir spillt de Putin weider mam Facteur Ongewëssheet.

EU-Gas-Noutfallplang / Reportage Claudia Kollwelter

Den Ament fléisst een Drëttel manner russesche Gas a Richtung EU, wéi nach virun engem Joer, sou d'Presidentin vun der EU-Kommissioun virun der Press. D'Ursula von der Leyen widderhëlt ee Saz ëmmer nees: ''Russland erpresst eis. Russland benotzt Energie als Waff''.

De Grond firwat d'EU-Kommissioun d'Käpp zesummegestreckt huet, fir datt Europa sou gutt wéi méiglech waarm duerch de Wanter kënnt... Kloer ass, dass de Gas-Noutfall-Plang virgesäit, privat Haushälter, ëffentlech Gebaier wéi Klinicken als geschützt Verbraucher unzegesinn, wat awer net bedeit, datt si net solidaresch handele sollen an och bannent den nächste Méint Gas spuere sollen. An enger éischter Phas setzt d'EU-Kommissioun generell nach op d'Wuert "Solidaritéit", fir 15% vum europäesche Gas ze spueren. Vun elo August, bis Mäerz d'nächst Joer: ''Firwat 15%? Dat entsprécht 45 Milliarde Kubikmeter Gas. Wa mer souvill aspueren, da kënne mer, am Fall wou Russland de Krunn zoudréit, awer sécher duerch de Wanter kommen", esou d'Ursula von der Leyen.

Sou och d'Berechnunge vun der EU-Kommissioun, déi e Mëttwoch e kloren Appell un d'Industrie geriicht huet. Manner Klimaanlag am Summer, manner Heizung am Wanter. Ma virun allem Energie-Intensiv Betriber sollen Efforte maachen, fir Gas ze spueren, och andeems Produktiounen ëmgestallt, respektiv verlagert ginn. Exporter solle wann néideg gedrosselt ginn. Den europäesche Bannemaart dierft net zesummebriechen. Stéchwuert: Liwwerketten.

Alles Propositioune vun der Kommissioun, déi den Ament awer net obligatoresch vun de Memberstaaten ëmgesat musse ginn. Grad do läit awer d'Kromm an der Heck: ''Wat geschitt am Fall, wou de Wanter Gas effektiv knapps gëtt?"

Dofir sollen d'Staaten elo preventiv ënner sech fräiwëlleg ee sou genannt ''Solidaritéits-Ofkommes'' ofschléissen. Där ginn et der den Ament just 6, fir bei Enkpäss Gas ëmzeverdeelen.

Staate kënnen och nees op Kuel, Pëtrol an Atomenergie zeréckgräifen. Geet dat am Krisefall net duer, da wëll d'Kommissioun ''Alarmen'' ausléisen. D'EU-Kommissärin fir Energie, Kadri Simson: ''An dëst wäert eng obligatoresch Verflichtung fir d'Memberstaaten ausléisen, fir d'Zil z'erreechen, 15% Gas ze spueren.''

Mat engem spezielle Pouvoir, dee se den Ament awer nach net huet, solle Staaten obligéiert ginn, weider drastesch Mesuren ëmzesetzen.