D'EU-Kommissioun diskutéiert e Sonndeg doriwwer, ob Ungarn d'Subside gekierzt kritt.

Verstéiss géint Rechtsstaatlechkeet un Ungarn solle Konsequenze kréien. D'EU-Kommissioun huet e Sonndeg roposéiert, datt Budapest soll 7,5 Milliarden Euro manner aus dem EU-Budget kréien. Dat huet den EU-Budgetskommissär Johann Hahn e Sonndeg am spéide Moien zu Bréissel annoncéiert.

D'Kommissioun reprochéiert Budapest, net genuch géint d'Korruptioun ze maachen an d'Grondrechter net genuch ze schützen. D'EU-Parlament huet Ungarn dës Woch iwwerdeems virgehäit, keng richteg Demokratie méi ze sinn. Fir datt Mesuren déi d'Kommissioun proposéiert kënnen ëmgesat ginn mussen op d'mannst 15 Memberstaaten averstane sinn.

Budapest huet signaliséiert, der EU wëllen entgéintzekommen. "D'Regierung huet d'Wënsch vun der Europäescher Unioun entweder acceptéiert oder, souwäit mir si net acceptéiere kënnen, e Kompromëss decidéiert, dee béid Säiten zefriddestellt", sou den Etat Majouer vum Ministerpresident Viktor Orban, de Gergely Gulyas. Mat Hëllef vun enger acceleréierter Prozedur wéilt Ungarn Gesetzer decidéieren, déi och d'Grënnung vun enger Korruptiounsbekämpfungsagence mat sech bréngt. Dës Gesetzer sollen deemno schonn am November a Kraaft trieden.

Ungarn soll dann nach eng Chance kréien an déi annoncéiert Reformen ëmzesetzen.

Johann Hahn iwwer ungaresch Reformen / Rep. Fanny Kinsch

De Johann Hahn:"Iwwert de Summer huet Ungarn 17 Mesure proposéiert, fir sech ze rattrapéieren, wat de Risiko fir den EU-Budget ugeet. Mat deene Mesuren huet Ungarn wichteg an ëffentlech Engagementer an déi richteg Richtung geholl an ech wëll dës konstruktiv Approchen hei explizitt begréissen. Och wa se spéit koum, wat zielt sinn effektiv d'Resultater."

D'Kommissioun géing d'Ëmsetze vun deene Reformen elo genee am Aen halen, Ungarn hätt bis den 19. November Zäit, fir konkret Progrèsen ze weisen. Well de Risiko esou héich wier, hätt d'Kommissioun awer decidéiert, d'Sanktioun schonn an d'Weeër ze leeden.

D'EU-Reunioun ass ausnamsweis op engem Sonndeg. D'Kommissiounspresidentin Ursula von der Leyen flitt e Méindeg op d'Begriefnis vun der Queen Elizabeth II. op London an duerno op d'UNO-Vollversammlung zu New York.