De Marc Angel kéint Vizepresident vum Europaparlament ginn an domat d'Successioun vun der Griichin Eva Kaili iwwerhuelen.

D'Eva Kaili war rezent wéinst Korruptiouns-Reprochen ofgesat ginn.

Wéi den LSAP-Europadeputéierte géintiwwer RTL confirméiert, huet hie seng Kandidatur gestallt an huet sech um Mëttwoch an der Mëttesstonn bei engem interne Vott vun den europäesche Sozialisten an Demokraten och duerchgesat. Am Ganze goufen et 7 Kandidaturen.

Well awer och aner Fraktiounen, dorënner sécher scho mol déi Gréng eng Kandidature wäerte stellen, kënnt et déi nächst Woch en Dënschden oder Mëttwoch zu engem Vott an der Plenière zu Stroossbuerg.

De Marc Angel ass zouversiichtlech.

Wann hie géif Vizepresident vum Europaparlament ginn, wier dat eng grouss Éier, esou de Lëtzebuerger Politiker. Sécher wier et e schwéieren Ament wéinst dem Korruptiounsskandal. Ma, hie gesäit sech als Bréckebauer tëscht de Fraktiounen als Teamplayer. Dat wier elo wichteg, well e gemeinsamen Effort vum EU-Parlament néideg wier, fir d'Vertraue vun de Leit erëmzekréien. D'Europaparlament misst elo Champion beim Kampf géint Korruptioun a bei der Transparenz ginn.

Dernieft huet de Marc Angel ënnerstrach, datt, wann hie sech fir Europa géif asetzen, dat och gutt fir Lëtzebuerg wier. Hie géif dowéinst och net bei de Gemengewalen oder Nationalwale matgoen.

Sollt de Marc Angel gewielt ginn, wär et eréischt déi zweete Kéier nom Nicolas Estgen 1979, datt e Lëtzebuerger Vizepresident vum Europaparlament ass. An zesumme mam Christophe Hansen, deen Quästor ass, wär et dann déi 1. Kéier, datt Lëtzebuerg zwee Memberen am EP-Präsidium hätt.

Am EU-Parlament zu Bréissel respektiv Stroossbuerg stinn am Ganze 14 Vizepresidenten der Presidentin Roberta Metsola zur Säit.