Am Juni 2022 gouf an der medezinescher Fachzäitschrëft The Lancet eng nei Etüd iwwer Myokarditis publizéiert, déi e puer Deeg duerno an de sozialen Netzwierker viral goung. Awer just, well se falsch interpretéiert gouf.

"De Lancet kënnt zur Konklusioun, dass d'Injektioun Myokarditis provozéiert (...) 900 vun 9.000 Persounen, d.h. eng Persoun vun 10, oder 10 %, ass rar", verséchert en Tweet, deen zënter dem 14. Juni iwwer 3.500 Mol gedeelt gouf a vun Internetuser op Facebook an Twitter weider propagéiert gouf.

E baséiert sech op en Artikel, deen zënter Mëtt Juni an diverse Blogge publizéiert gouf an den Titel dréit: "Paukenschlag: D'Fachzäitschrëft The Lancet confirméiert héije Myokarditis-Risiko duerch d'Impfung mam Pfizer- a Moderna-Vaccin."

RTL

Capture d'écran prise sur Twitter, le 22/06/2022

RTL

Capture d'écran prise sur Twitter, le 22/06/2022

RTL

Capture d'écran prise sur Twitter, le 22/06/2022

Leschtere verweist op eng Etüd, déi den 11. Juni 2022 an der renomméierter medezinescher Fachzäitschrëft The Lancet publizéiert gouf an den Titel dréit: "Risiko vu Myokarditis a Perikarditis no mRNA-Impfung géint Covid-19 an den USA: Kohortenetüd mat Datebanke fir Signalementer."

Myokarditis, eng Entzündung vum Häerzmuskel, a Perikarditis, eng Entzündung vun der Membran, déi d'Häerz ëmschléisst, gi meeschtens duerch eng Virusinfektioun (wéi Covid-19) ausgeléist an triede bei jonke Männer op. An de meeschte Fäll verbessert sech de Gesondheetszoustand vun de Patiente vu selwen oder duerch en Traitement, wéi et op der Internetsäit vun der franséischer Agence nationale de sécurité du médicament et des produits de santé (ANSM) heescht.

"D'Myokarditis ass eng seelen Häerzkrankheet mat enger ganz heterogeener, ganz villsäiteger Presentatioun, déi vu Symptom-aarme (wéineg symptomatesch, Um. v. d. Red.) Formen geet, déi glécklecherweis déi meescht Fäll ausmaachen, bis zu ganz schwéiere Formen, déi zur Reanimatioun féiere kënnen", huet de Mathieu Kerneis, Kardiolog am Hôpital de la Pitié-Salpêtrière a responsabele Fuerscher fir de Beräich "Myokarditis" an der Grupp "Action coeur", den 23. Juni géintiwwer der AFP erkläert.

"D'Myokarditis betrëfft virun allem Männer a jonk Männer, aus Grënn, déi nach net ganz verstane sinn", füügt de Fuerscher bäi a weist dorop hin, dass Myokarditis a Perikarditis "sécherlech entzündlech Erkrankunge vum Häerz sinn, awer Myokarditis potentiell grav ass, wärend Perikarditis an der Reegel eng méi harmlos Erkrankung ass, bei där een net forcement hospitaliséiert gi muss."

Wat seet d'Etüd aus dem Lancet?

D'Fuerscher, déi hir Aarbecht am The Lancet publizéiert hunn, hu Fäll vu Myokarditis a Perikarditis bei Persounen ënnersicht, déi mat mRNA-Impfstoffer vu Pfizer-BioNTech a Moderna geimpft goufen.

Si hunn eng "retrospektiv Kohortenetüd" duerchgeféiert, an där d'Optriede vu bestëmmten Evenementer (hei Myokarditis a Perikarditis, déi no Injektioune vun mRNA bei verschiddenen Altersgruppen opgetruede sinn) ënnersicht gouf, fir dës mat dem duerchschnëttlechen Optriede vu Myokarditis a Perkarditis an dëse Populatiounen ze vergläichen. D'Basisberechnunge koume vu Patienten aus fréiere Kohortenetüden.

"Insgesamt goufe 411 Fäll vu Myokarditis an/oder Perikarditis bei 15.148.369 Persounen am Alter vun 18 bis 64 Joer observéiert, déi 16.912.716 Dosisse BNT162b2 (Pfizer-BioNTech-Impfstoff, Um. v. d. Red.) an 10.631.554 Dosissen m-1273-RNA (Moderna-Impfstoff, Um. v. d. Red.) gesprëtzt kruten", schreiwen d'Auteure vun der Etüd.

Konkreet bedeit dat, dass 411 Fäll vu Myokarditis a Perikarditis bei 15.148.369 geimpften Erwuessenen a bei 27.544.270 gesprëtzte Vaccinsdosisse registréiert goufen, wat enger Myokarditis oder Perikarditis bei ongeféier 67.000 gesprëtzten Dosissen an engem Fall bei 36.857 geimpfte Persounen entsprécht. Dës Zuele leien also wäit fort vun den 10 % Häerzmuskelentzündungen, déi den Aussoe vum Artikel an de sozialen Netzwierker no bei Geimpfte festgestallt goufen.

"No der Impfung mat engem mRNA-Vaccin géint Covid-19 gouf e méi héije Risiko fir Myokarditis oder Perikarditis observéiert an zwar bei Männer am Alter vun 18 bis 25 Joer no der zweeter Impfdosis. D'Inzidenz war awer seelen. Dës Resultater deiten net op e statistesch signifikanten Ënnerscheed am Risiko mat mRNA-1273 oder BNT162b2 hin, mee esou een Ënnerscheed kann net ausgeschloss ginn. D'Resultater vun eiser Etüd souwéi d'Notz-Risiko-Verhältnis schwätze weiderhi fir d'Impfung mat engem vu béiden mRNA-Impfstoffer", resuméieren d'Auteure vun der Etüd.

RTL

Capture d'écran de l'étude du Lancet, prise le 22/06/2022 sur le site de la revue

"De Pabeier aus dem Lancet weist, dass d'Prevalenz vun dëse Fäll nach ëmmer ganz rar ass: Vun honnertdausende Mënsche gi just e puer Dose Fäll gemellt. Et muss een och festhalen, dass Myokarditis a Perikardits vermëscht ginn, obwuel et zwou verschidde Krankheete sinn", resuméiert de Kardiolog a Fuerscher Mathieu Karneis.

Vu wou kommen déi 10 %?

Déi "900" Fäll vun "9.000" Patienten, déi an de sozialen Netzwierker genannt goufen an déi "10 %" vun de registréierte Myokdarditis-Fäll entspriechen, sinn an der Etüd vum Lancet net enthalen. Eng erweidert Google-Recherche mat dësen Zuelen an de Begrëffer "Impfstoffer", "Etüd" a "Myokarditis" féiert zu anere Recherchen, déi am November 2021 op der Websäit vum franséische Fuerschungsverband EPI-PHARE, ënnert dem Titel ""Myocardite et péricardite après la vaccination Covid-19", verëffentlecht goufen.

EPI-PHARE ass eng wëssenschaftlech Interessevertriedung, déi Enn 2018 vun der franséischer Agence nationale de sécurité du médicament et des produits de santé et la Caisse nationale d'assurance maladie (CNAM) gegrënnt gouf a pharmakoepidemiologesch Etüden op Basis vun den Donnéeë vum Système National des Données de Santé (SNDS) duerchféiert, "fir den Agencen an Administratiounen bei hiren Decisiounen ze hëllefen."

Déi am November 2021 publizéiert Etüd ziilt dorop of, "den Zesummenhang tëscht den Impfstoffer vu Pfizer-BioNTech a Moderna an dem Myokarditis- a Perikarditis-Risiko bei all de Persounen tëscht 12 a 50 Joer a Frankräich ze moossen."

RTL

(FILES) In this file photo taken on January 07, 2022, the Moderna Covid-19 vaccine is prepared for administration at Union Station in Los Angeles. The US Food and Drug Administration granted emergency authorization Friday for the use of Pfizer and Moderna Covid-19 vaccines in the youngest children, the final age group awaiting immunization in most countries. ( AFP / Frederic J. BROWN)

Zënter dem Summer 2021 gëlle Myokarditis a Perikarditis a Frankräich als Niewewierkungen, déi no enger Impfung géint Covid-19 mat engem mRNA-Impfstoff (Pfizer-BioNTech oder Moderna) optriede kënnen, wéi d'Fuerscher vun EPI-PHARE festgestallt hunn.

Hirer Etüd no sinn a Frankräich wärend dem ënnersichten Zäitraum insgesamt 919 Fäll vu Myokarditis (medianen Alter 26 Joer, 21 % Fraen) an 917 Fäll vu Perikarditis (medianen Alter 34 Joer, 38 % Fraen) bei Persounen am Alter vun 12 bis 50 Joer opgetrueden. Dës Fäll goufe mat 9.190 Fäll (bei Myokarditis) an 9.170 Fäll (bei Perikarditis) verglach."

Wéi de Mahmoud Zureik, Professer fir Epidemiologie an Direkter vum EPI-PHARE, den 20. Juni der AFP géintiwwer erkläert huet, léisst sech bei engem Verglach vun dësen Zesummenhäng net soen, dass 900 Fäll vun Häerzentzündunge bei 9.000 Patiente festgestallt goufen.

Onverständnis vun der Methodik

"Dës 10-Prozent-Geschicht ass komplett falsch", verséchert de Fuerscher. "Fir eng Relatioun tëscht Ursaach a Wierkung ze ënnersichen (hei schwätze mir vu Myokarditis a Relatioun mat enger Impfung), kann et méi epidemiologesch Gestaltunge fir Etüde ginn. En éischten Usaz ass, vun der Expositioun auszegoen, d.h. dass et Mënsche gëtt, déi geimpft sinn, a Mënschen, déi net geimpft sinn, a mir suivéiere béid Gruppen, fir d'Unzuel vun der Myokarditis tëscht Geimpften an Net-Geimpften ze vergläichen. Dat gëtt am Allgemengen als Kohortenetüd bezeechent", erkläert hien.

Dogéint gouf bei der EPI-PHARE-Etüd eng aner, klassesch Method benotzt, nämlech déi vun der Fallobservatioun. "Hei fänke mir net mat der Expositioun, mee mat der Wierkung un. Bei de Fäll handelt et sech ëm Myokarditis, an d'Kontrollpersoune si Leit, déi keng Myokarditis haten an déi aus der Populatioun ausgewielt goufen, aus där d'Fäll stamen. Dës Kéier kucke mir eis un, wie geimpft a wien net geimpft gouf, a mir vergläichen den Undeel vu geimpfte Leit mat de Fäll an den Observatiounen. Dat ass e Spigelbild vun der Kohortenetüd", seet de Mahmoud Zureik a weist dorop hin, dass esou Fallobservatiounen heefeg favoriséiert ginn, "wann den ënnersichten Effekt rar ass."

Konkreet bedeit dat, dass d'Fuerscher, wa si eng Rei vu Fäll vun enger bestëmmter Wierkung (hei Myokarditis a Perikarditis) observéiert, eng Rei vun "Observatiounen" auswielen, deenen hir Profiller (besonnesch a Bezuch op Alter a Geschlecht) mat deene vu Persounen, déi eng Wierkung gewisen hunn, fir béid Gruppe matenee vergläichen ze kënnen. D'Unzuel vun den ausgewielten Observatioune gëtt vun de Fuerscher ënner Consideratioun vu verschiddene Krittären, besonnesch der Heefegkeet vun der ënnersichter Wierkung, festgeluecht.

An dësem Fall "goufen 10 Kontrollpersounen ausgewielt, well d'Wierkung rar ass a fir d'Relatioun tëscht Impfstoffer a Myokarditis genee ofschätzen ze kënnen. Huele mir un, mir hunn eis decidéiert, eng Observatioun fir e Fall ze huelen, dat bedeit net, dass et 50 % vun de Myokarditis-Fäll duerch eng Impfung ausgeléist ginn... Dorun ze denke bedeit, dass een d'Methodik iwwerhaapt net beherrscht. Wichteg ass, wéi vill Fäll bei wéi vill Injektiounen optrieden", resuméiert den Direkter vun EPI-PHARE.

Déi an der Etüd genannten Zuele weisen awer op eng Myokarditis vun héchstens 130 Fäll pro 1 Millioun Injektiounen hin, wat bei den am stäerkste betraffene Gruppen (Männer ënner 30 Joer, déi mat Moderna geimpft goufen) wäit fort vun den 10 % leit, déi an de Publikatioune genannt ginn.

En net existéierende "Paukenschlag"

An dësem Fall war d'EPI-PHARE-Etüd schonn am November 2021 zur Konklusioun komm, dass "de Risiko vun enger Myokarditis a Perikarditis bannent siwen Deeg no der Impfung géint Covid-19 mat engem mRNA-Impfstoff (Pfizer-BioNTech a Moderna) bei Persounen am Alter vun 12 bis 50 Joer, besonnesch bei jonke Mënschen ënner 50 Joer, besonnesch bei de Jonken ënner 30 Joer, confirméiert gouf." Se huet och festgestallt, dass "dëse Risiko mam Moderna-Impfstoff méi héich ass. D'Zuel vum mam Impfstoff associéierte Fäll schéngt awer am Verglach zur Zuel vun de gesprëtzten Dosisse rar ze sinn" a "confirméiert och déi positiv klinesch Entwécklung vun de Myokarditis- a Perikarditis-Fäll no der Impfung."

Dës Fuerschunge goufen iwwregens vun de franséische Gesondheetsagencë berécksiichtegt, wéi de Mahmoud Zureik betount huet. Ufank November 2021 hat déi franséisch Haute Autorité de Santé e Communiqué publizéiert, an deem et housch: "An Erwaardung vu weideren Donnéeën iwwer de Myokarditis-Risiko an (...) ugesiichts vun der Insuffisance vun der Risikoreduktioun vu Myokarditis mam Impfstoff Spikevax [dee vu Moderna, Um. v. d. Red.] recommandéiert d'HAS, fir Persounen ënner 30 Joer, bei Disponibilitéit, den Impfstoff Comirnaty [vu Pfizer-BioNTech, Um. v. d. Red.]."

Myokarditis a Perikarditis, déi no der Impfung opgetruede sinn, gi vun de Gesondheetsagencen iwwerwaacht, säit d'Impfcampagne géint Covid fir déi gesamt Bevëlkerung a Frankräich ugelaf ass.

"Et ass eppes, dat ganz bekannt ass, an dat gouf souguer scho viru Covid iwwerwaacht. Myokarditis gëtt an éischter Linn duerch Viren ausgeléist: An néng vun zéng Fäll, gëtt Myokarditis duerch e Virus ausgeléist. An deenen anere méigleche Fäll kann et Medikamenter ginn, et gëtt fënnef Haaptklasse vu Medikamenter, déi Myokarditis ausléise kënnen, Impfstoffer inclus", erkläert de Mathieu Kerneis.

Hie weist och dorop hin, dass schonn am Fréijoer 2021 éischt Fuerschungsresultater fir d'Iwwerwaachung vu Myokarditis a Perikarditis no enger Impfung géint Covid publizéiert goufen. Sou haten déi amerikanesch Gesondheetsagencë schonn am Abrëll 2021 matgedeelt, dass si Meldungen iwwer Myokarditis-Fäll, déi iwwer de Pharmacovigilance-System gemellt goufen, opmierksam suivéieren.

Zënterhier gi weider Donnéeë vu Fuerscher aus der ganzer Welt kontinuéierlech iwwerwaacht. EPI-PHARE huet beispillsweis am Abrëll 2021 eng zweet Etüd zu dësem Theema publizéiert a preparéiert den Aussoe vum Direkter no eng drëtt Etüd vir.

RTL

Des fioles de vaccin anti-Covid au centre de vaccination de Sonthofen, dans le sud de l'Allemagne, le 30 novembre 2021 ( AFP / Christof STACHE)

Et ass dohier ierféierend, d'Publikatioune vun der Etüd vum Juni 2022 am Lancet als "Paukenschlag" duerzestellen, wéi et déi vun der AFP befrote Fachleit ausdrécken. "Déi jéngst Etüd confirméiert um Enn just Saachen, déi mir schonn zënter enger gewësser Zäit wëssen. Alles ass public, alles ass transparent: Et ass scho bekannt, dass et en Zesummenhang tëscht Myokarditis an der Impfung gëtt, de Géigendeel gouf ni behaapt, an de Risiko ass geréng", seet de Mahmoud Zureik.

"Dat ass absolut näischt Neies. Et gouf quasi vun Ufank un iwwerwaacht, well et eng bekannt Niewewierkung vun Impfstoffer ass, déi deemools nach net entdeckt war. Et gouf séier Fortschrëtter, déi zur Ariichtung vun engem Pharmacovigilance-System geféiert hunn, an deem Fäll gemellt ginn", confirméiert de Mathieu Kerneis.

Béid Fuerscher hunn dorop higewisen, dass Myokarditis, déi no der Impfung festgestallt gouf, net als "grav" ugesi gëtt, well Patienten an der Reegel nees e puer Deeg no hirer Hospitaliséierung aus der Klnick entlooss ginn.

Doriwwer eraus weist de Mathieu Kerneis dorop hin, dass Fäll vu Myokarditis, déi no enger Covid-Impfung gemellt goufen, "ënnert d'Lupp geholl" sollte ginn, a verweist dobäi besonnesch op eng Etüd vun israeelesche Wëssenschaftler, déi am September 2021 am New England Journal of Medicine publizéiert gouf. An der leschtgenannter Etüd hunn d'Fuerscher d'Unzuel vun de Fäll vu Myokarditis no enger Impfung mam Pfizer-Impfstoff op 3 pro 100.000 geschat, no enger Covid-19-Infektioun op 11 pro 100.000. "Dat alles däerf d'Impfung net bremsen, ganz am Géigendeel", mengt hien.

Zënter dem Ufank vun der Covid-19-Pandemie goufe vill Etüden a wëssenschaftlech Publikatiounen an de sozialen Netzwierker falsch interpretéiert. Am Mee 2020 hat d'AFP verschidde Repairen dozou an engem Artikel genannt. D'AFP huet zënter dem Ufank vun der Pandemie - a bis den 23. Juni 2022 - méi wéi 770 Verifizéierungsartikelen zu Covid-19 op Franséisch verfaasst.