Deels ass d'Situatioun am nordafrikanesche Land bei de Protestaktiounen eskaléiert.

Et war déi bis ewell gréisst Protestaktioun géint den algeresche President Bouteflika. E Freideg de ganzen Dag iwwer ass d'Aktioun friddlech verlaf. Ma owes, wou dat Ganzt am Fong scho sollt eriwwer sinn, gouf plazeweis nach randaléiert. E Samschdeg gouf du bekannt, dass dobäi méi wéi 200 Leit blesséiert goufen.

D'Manifestante goufe mat Tréinegas a Gummismunitioun beschoss. Eng 100 Zivilisten a méi wéi 100 Poliziste goufen dobäi blesséiert.

Fir d'Situatioun ze berouegen, huet den Educatiounsministère e Samschdeg iwwerraschend decidéiert, dass d'Fréijoersvakanz op bal véier Woche verlängert gëtt an e Sonndeg ufänkt. Besonnesch an den Unie gouf et an der Lescht ëmmer erëm Protestaktiounen.

Zanter Woche protestéieren all Weekend Zéng- an e Samschdeg souguer honnertdausende Leit géint eng fënneft Presidentschaft vum Abdelaziz Bouteflika, deen d’Land schonn zanter 20 Joer regéiert. Hie läit am Moment zu Genf am Spidol.